Сурхондарёда шифокор ва беморни калтаклаган “Alfa” жиноий гуруҳи аъзолари қўлга олинди

Маълум қилинишича, Давлат хавфсизлик хизмати ҳамда Ички ишлар бошқармаси ходимлари томонидан Сурхондарё вилоятининг Денов туманида яшовчи олти нафар шахсдан иборат жиноий гуруҳнинг ноқонуний фаолияти тўхтатилган.

ИИВ маълумотларига кўра, ушланганлар ўзларини “Alfa” деб атаб, Telegram ижтимоий тармоғида шу номда гуруҳ ташкил этган. Гуруҳ аъзолари турли спорт турлари билан шуғулланиб, кўча жанжалларида иштирок этиб келган.

Жиноий гуруҳ раҳбари 28 ёшли Холмуродов Суннатуллох Музаффарович экани аниқланган. Гуруҳ аъзолари қуйидагилар:

• Каримов Элбек Муродулла ўғли, 1998 йилда туғилган
• Ибодов Аслиддин Карим ўғли, 1998 й.т.
• Давлатов Азамат Алишер ўғли, 1998 й.т.
• Жўраев Жавоҳир Бурон ўғли, 1998 й.т.
• Жумаев Баҳриддин Норматович, 1989 й.т.

Тергoв маълумотларига кўра, 6 январь куни соат тахминан 20:50 да мазкур шахслар Денов тумани тез тиббий ёрдам бўлимига Skoda ва Kia автомобиллари иштирокида содир бўлган ЙТҲдан сўнг етиб келган. Уларнинг мақсади Skoda ҳайдовчиси бўлган танишини кўриш ҳамда Kia автомобили ҳайдовчисига нисбатан жисмоний босим ўтказиш бўлган.

Шифохонада улар асоссиз равишда жанжал чиқариб, маъмуриятнинг тартибга риоя қилиш ҳақидаги талабларига бўйсунмаган. Натижада шифокор ва жабрланган фуқарога тан жароҳатлари етказилган.

Мазкур ҳолат юзасидан Ўзбекистон Республикаси Жиноят кодексининг 277-моддаси 3-қисми “г” банди (ҳокимият ёки жамоатчилик вакилига қаршилик кўрсатиш билан боғлиқ безорилик) билан жиноят иши қўзғатилган. Гумонланувчилар қўлга олинган ва уларга нисбатан қамоққа олиш тарзидаги эҳтиёт чораси қўлланилган.

ИИВ фуқароларни ушбу жиноий гуруҳ ҳаракатларидан жабр кўрган бўлса, ички ишлар органларига мурожаат қилиш ёки 102 қисқа рақамига қўнғироқ қилишга чақирди.