Қашқадарёда юздан ортиқ арча кесиб кетилди

Қашқадарё вилоятида жойлашган Деҳқонобод давлат ўрмон хўжалиги Дуоб ўрмон бўлими ҳудудида 104 дона Зарафшон арча дарахти таг қисмидан кесиб ташланди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар берди.

Ўзбекистон

30.01.2025, 11:47

Lotinchada

Улашиш:

Qashqadaryoda yuzdan ortiq archa kesib ketildi

Унда айтилишича, Дуоб ўрмон бўлими 4 сарҳад ҳудудида фуқаро К.М. томонидан 3 дона Зарафшон арча дарахтлари таг қисмидан ўсишдан тўхташ даражасида кесиб ташланган. Фуқарога нисбатан жарима қўлланилиб, ўрмон хўжалигига етказилган 51 миллион 810 минг сўм зарар ҳисобланган.

Мазкур ҳолат сабаб Дуоб ўрмон бўлими бошлиғи вазифасида ишлаган З.Б. ҳамда 4 сарҳад ўрмон қўриқчиси вазифасида ишлаган Ҳ.Э.га ўз лавозим вазифасига лоқайдлик билан қараганлиги учун маъмурий жарима қўлланилган.

Шунингдек, шу ҳудудда Зарафшон арча дарахтларининг 38 донаси номаълум шахслар томонидан таг қисмидан ва ён шохлари кесилган. Ўрмон қўриқчиси Ҳ.Э.га такрорий маъмурий жарима қўлланилган. Ўрмон хўжалигига 94 миллион 387 минг 500 сўм зарар етказилганлиги ҳисобланилган ва Фуқаролик ишлари бўйича Ғузор туманлараро судига даъво ариза киритилган.

"Бундан ташқари, Дуоб ўрмон бўлими 3 сарҳад ҳудудида ҳам номаълум шахслар томонидан ноқонуний равишда 6 дона Зарафшон арча дарахтлари кесиб кетилган.

Ҳудуд ўрмон қўриқчиси Р.Б.га нисбатан маъмурий чора қўлланилиб, ўрмон хўжалигига етказилган 41 миллион 400 минг сўм зарар етказганлиги маълум бўлган ва ҳужжатлар судга юборилган", дейилади хабарда.

Қолаверса, айнан мазкур ҳудудда фуқаро Ҳ.А. томонидан 8 дона (зарар миқдори 25 миллион 387 минг 500 сўм) Зарафшон арчаси таг қисмидан ва ён шохлари кесилаётган. Унга ҳам маъмурий жарима қўлланилиб, ҳужжатлар Фуқаролик ишлари бўйича Ғузор туманлараро судига юборилган.

Шу билан бирга, номаълум шахслар томонидан ноқонуний равишда 49 дона Зарафшон арча дарахти ўсишдан тўхташ даражасида кесиб кетилган. Оқибатда ўрмон хўжалигига 176 миллион 587 минг 500 сўм зарар етказилган ва зарарни ундириш учун ҳужжатлар Деҳқонобод туман прокуратурасига ўтказилган.

Жами ҳисобда Дуоб ўрмон бўлими ҳудудида жами 104 дона Зарафшон арча дарахти таг қисмидан кесилган ва ўсишдан тўхтамас даражада шикастлантирилган. Ҳолатлар юзасидан ўз вазифасига совуққонлик билан ёндашган маъсул шахсларга, ҳуқуқбузарларга нисбатан чора белгилаш масалалари кўриб чиқилмоқда.

Ўзбекистон

30.01.2025, 11:47

Улашиш:

#экология #арча

мавзуга оид янгиликлар