Ҳормуздаги вазият: 670 та кема кутиб турибди

Bloomberg ва денгиз транспорти ташкилотлари маълумотларига кўра, Ҳормуз бўғозининг ёпилишидан энг кўп зарар кўрганлар орасида Греция, Бирлашган Араб Амирликлари ва Хитой юк ташиш компаниялари бор.

Ўтган 48 соат ичида бўғознинг ғарбий томонида 670 га яқин юк кемалари кутиб тургани аниқланган. Улардан 120 таси (умумийдан 18 %) БАА компанияларига тегишли.

Кемаларнинг жойлашуви AIS (Автоматик идентификация тизими) ёрдамида кузатиб борилади. Бу — аксарият тижорат кемаларида ўрнатилиши шарт бўлган транспондер технологияси бўлиб, у кеманинг ўрни, тезлиги, ҳаракат йўналиши ва номини бошқа кемалар ҳамда қирғоқ станцияларига узлуксиз узатиб туради.

Баъзи кемалар ўз кузатув тизимларини ўчириб қўйган бўлиши мумкинлиги сабабли, эҳтимол, ҳақиқий рақамлар бундан юқорироқдир.

Греция ва Хитой жиддий зарар кўрмоқда

Греция можаро бошланганидан бери энг кўп жабр кўрган иккинчи давлатдир. Грецияга қарашли компаниялар бу давр мобайнида бўғозда камида 75 та (умумийдан 12 %) юк кемасини бошқарган.

Уларнинг тахминан 30 таси нефть ёки газ танкерларидир.

Минтақадаги 74 та юк кемаси Хитойга тегишли бўлиб, уларнинг 25 таси нефть ва газ танкерлари, қолганлари эса қуруқ юк ташувчилар ва контейнер кемаларидир.

Япония компанияларининг бўғозда камида 23 та нефть ва газ ҳамда 16 та қуруқ юк ташувчи кемаси бор.

Шунингдек, ҳудудда Гонконгга алоқадор 13 та энергетика ва 12 та қуруқ юк кемаси ҳам мавжуд. Ҳиндистон компанияларининг эса минтақада 24 та танкери бор.

Бундан ташқари, Сингапурга тегишли 29 та, Жанубий Корея компанияларининг 22 та, Ветнамнинг эса учта йирик суюлтирилган газ ташувчи кемаси қолиб кетган

Туриб қолган супертанкерлар

50 га яқин ўта йирик нефть танкери (супертанкер) ва 11 та ўта йирик газ ташувчи кема тўхтаб қолган бўлиши мумкин.

Бу супертанкерларнинг еттитаси Жанубий Кореяга, олтитадан Хитой ва Японияга, бештаси эса Грецияга тегишли.

Уруш даврида бўғоздан ўтган кемалар

Денгиз разведкаси билан шуғулланувчи “Kpler” агентлигига кўра, можаро бошланганидан бери юк ташувчи кемалар амалга оширган 225 та кесиб ўтишнинг 40 дан ортиғи Эрон кемалари ҳиссасига тўғри келади

Яна 60 та кесиб ўтиш Эрон байроғи билан сузмайдиган ёки бевосита унга тегишли бўлмаган, бироқ АҚШнинг Эронга қарши дастури доирасида санкцияга учраган кемалар томонидан амалга оширилган.

Тахминан 35 та кесиб ўтишни Грецияга тегишли кемалар уддалаган. Булардан саккизтаси “Dynacom Tankers Management” номли компанияники.

Шунингдек, Хитойга алоқадор камида 20 та ва Ҳиндистонга тегишли 13 та кема ҳам бу йўналишдан ўтган.

Эроннинг дўст мамлакатлар кемаларига хавфсиз ўтиш имконини берувчи назорат тизимидан баъзи кемалар фойдаланганга ўхшайди.

Суғурта харажатларининг кескин ошгани ҳамда экипаж ва юклар учун хавфнинг ўта юқорилиги сабабли юзлаб кемалар қатновни тўхтатиб турибди.

Муаллиф: Исомиддин Жуманазаров