“Бешқўрғон” бозоридаги ёнғин: жабрланганлар йўқ — ФВВ

Ёнғин қандай юз берди?

Ҳодиса 5 апрель куни Чилонзор туманида, Тошкент катта ҳалқа автомобиль йўли бўйида жойлашган бозор ҳудудида содир бўлган.

Соат 15:56 да дўкон ёнаётгани ҳақида хабар келиб тушган. Қутқарув ва ёнғин ўчириш гуруҳлари зудлик билан воқеа жойига етиб бориб, ёнғинни ўчириш ишларини бошлаган.

Ҳодиса жойига ФВВ раҳбари Азизбек Икромов ҳам етиб борган.

Қутқарувчилар ёнғиннинг кенг ҳудудга тарқалишининг олдини олган.

Ижтимоий тармоқларда ҳодиса жойидан олинган видеоларда қуюқ қора тутун осмонга кўтарилгани акс этган. Шунингдек, айрим фуқаролар бозор ичидан ўз товарлари ва автомобилларини олиб чиқишга шошилгани кўринган.

Текширув давом этмоқда

Ҳозирда ёнғин сабаблари ва етказилган моддий зарар миқдори аниқланмоқда. ФВВ оммавий ахборот воситалари ва блогерларни текширилмаган маълумотларни тарқатмасликка чақирди.