Ўзбекистонликларни бортга чиқармай камситган WizzAir ҳақида канадалик хонанда қўшиқ куйлади

Блогер Шаҳноза Соатованинг ёзишича, канадалик машҳур қўшиқчи Девид Керолл  2008 йили “United airlines” авиакомпанияси қиммат ($3500) гитарасини синдириб, товон тўлаб бермагани учун бу ҳақда қўшиқ ёзиб, “Ютуб”га чиқарган ва компаниянинг 180 миллион доллар зарар кўришига сабабчи бўл. Унинг ушбу иши билан жаҳон авиациясида мижозлар билан ишлаш стратегиясининг тубдан ўзгаришига сабабчи бўлган.

Ушбу хонанда бу сафар юртдошимиз, косонсойлик Суҳроб Убайдуллаев ва унинг WizzAir авиакомпанияси билан можароси ҳақида қўшиқ куйлади.

Суҳробни 2023 йил августида Римдаги аэропортда WizzAir компанияси самолёт бортига чиқармаган — шунчаки ўзбекистонлик бўлгани учун! Натижада Абу Даби орқали транзит билан учаётган талабанинг чипталари куйиб кетган, бир ҳафта юртма-юрт сарсон бўлиб, қарзга ботиб, аранг уйига етиб келган. 

Авиакомпания ўзбекистонлик йигитни бортга бесабаб чиқармагани етмагандек, пулини ҳам қайтариб бермаган. 

“Бу бедодликка чек қўйиш керак”, – деб ёзади Шаҳноза Соатова. Унинг қўшимча қилишича, Суҳроб Wizzair’ни Европа судига берган. Девид Керолл эса уни қўллаб қўшиқ ёзибди ва клип суратга олган. 

Wizz Air — 2003 йилда таъсис этилган Венгрия лоукастери бўлиб, 50 дан ортиқ давлатга, шу жумладан, Ўзбекистонга парвозларни амалга оширган. Арзон авиакомпания жорий йил сентябридан Самарқанд ва Тошкентга парвозларни бекор қилди. Сўнгги йилларда йўловчилар ҳуқуқлари, кечиктирилган парвозлар ва хизмат кўрсатиш стандартлари бўйича компания атрофида бир қатор баҳс ва танқидлар кузатилган.