Ўзбекистонда пахта теримига мажбурлаган 8 нафар мансабдор жазоланди

Пахта терими давомида ўтказилган мониторинглар чоғида мутахассислар 74 та меҳнат қонунчилиги бузилиши ҳолатини аниқлади. Натижада 8 нафар масъул шахс жавобгарликка тортилди, деб хабар берди Камбағалликни қисқартириш ва бандлик вазирлиги матбуот хизмати.

Дастлабки қонунбузарлик ҳолатларидан бири Сурхондарё вилояти Қумқўрғон туманида қайд этилди. Туман ҳокимининг ўринбосари хотин-қизлар ва оила кенгашлари фаолларига фуқароларни пахта теримига жалб этишни топширган. У меҳнатга маъмурий мажбурлаш учун Маъмурий жавобгарлик тўғрисидаги кодекснинг 51-моддаси 1-қисмига мувофиқ жаримага тортилди.

Худди шундай ҳолат Бухоро вилоятида ҳам кузатилди — Абу Али ибн Сино номидаги ахборот-кутубхона маркази раҳбари ҳам фуқароларни пахта теримига мажбурлагани учун жаримага тортилган.

Вазирликнинг маълум қилишича, бу мавсумда мавсумий ишчиларнинг меҳнат ҳуқуқларига риоя этилиши устидан назорат кучайтирилган. Мониторинглар натижасида 1400 дан зиёд пахта терувчи расмий меҳнат шартномаси тузиш имкониятига эга бўлган, бу эса уларнинг ижтимоий ва меҳнат кафолатларини таъминлайди.