Islom taraqqiyot banki Oʻzbekiston yoʻllari va maktablari uchun 160 mln dollar ajratadi

Mazkur kelishuvlar Saudiya Arabistonida boʻlib oʻtgan AIUla konferensiyasi doirasida Islom taraqqiyot banki prezidenti Muhammad Al-Jasser hamda Oʻzbekiston Bosh vaziri oʻrinbosari — iqtisodiyot va moliya vaziri Jamshid Qoʻchqorov tomonidan imzolandi.

Avtomobil yoʻllarini rekonstruksiya qilish loyihasi uchun 70 million dollar ajratiladi. Ushbu mablagʻlar hisobidan Jizzax viloyatida 143 km hududiy avtomobil yoʻli hamda 30 km mahalliy va qishloq yoʻllari taʼmirlanadi. Loyiha 200 mingdan ortiq aholi uchun transport xavfsizligi va harakat qulayligini oshirishga qaratilgan.

SmartEd loyihasi uchun esa 94 million dollardan ortiq mablagʻ yoʻnaltiriladi. Loyiha doirasida 58 ta yangi maktab qurilib, mavjud taʼlim muassasalarida 2 400 dan ortiq sinf xonalari tashkil etiladi. Ushbu tashabbus har yili taxminan 73 ming nafar oʻquvchi hamda 36 mingdan ortiq pedagog va maʼmuriy xodimlar uchun foyda keltiradi.

Islom taraqqiyot banki Oʻzbekiston bilan hamkorlikni yanada kengaytirish va mamlakatning ijtimoiy hamda infratuzilma sohalaridagi muhim loyihalarni qoʻllab-quvvatlashda davom etishini maʼlum qildi.