“Rossiya har oy 30-35 ming askaridan ayrilmoqda” – Zelenskiy

Kiprda bo‘lib o‘tayotgan norasmiy sammitda Volodimir Zelenskiy Ukrainani qo‘llab-quvvatlash bo‘yicha Yevropa yordam paketi hamda Rossiyaga qarshi 20-sanksiyalar paketi uchun barcha Yevropa yetakchilariga minnatdorchilik bildirdi.

Ushbu 90 milliardlik yordam mablag‘lariga armiya uchun qurol-yarog‘, jumladan, havo hujumidan mudofaa tizimlari sotib olinadi.

Zelenskiy amerikaliklar ayrim cheklovlarni yengillashtirgan bir paytda Rossiyaga qarshi sanksiyalarni davom ettirishni so‘radi.

Prezident frontda vaziyat o‘zgargani, pozitsiyalar avvalgi oy va yillarga nisbatan ancha barqarorlashgani va Rossiya har oy kamida 30-35 ming askaridan ayrilayotganini aytib o‘tdi.

“Rossiya uchun vaziyat og‘ir va biz ularni diplomatiyaga majburlash uchun sharoitni yanada qiyinlashtirishimiz kerak”, – dedi u.

Zelenskiyning ta’kidlashicha, Ukraina ayni paytda Yaqin Sharq va Fors ko‘rfazi mamlakatlari bilan faol hamkorlik qilmoqda. Kiyev ularga nafaqat dronlar, balki to‘laqonli mudofaa tizimini taklif etmoqda.

Ukraina yetakchisi hozirda arab davlatlari bilan “Shahed” dronlariga qarshi hamkorlik qilinayotgani kabi, Yevropada ham integratsiyalashgan yagona mudofaa tizimini yaratishni taklif qildi. Bu tizim qirg‘oq chiziqlari va muhim infratuzilmalarni to‘liq himoya qiladi.

Turg‘un muzokaralar davri tugadimi?

Zelenskiy sammitga borish chog‘ida jurnalistlarga intervyu berar ekan, Ukraina Yevropa Ittifoqiga to‘laqonli a’zo bo'lishi shartligini bildirdi.

“Ukraina o‘zini va shu bilan birga Yevropani ham himoya qilmoqda. Bu ramziy himoya emas – u yerda odamlarimiz qurbon bo‘lyapti”, – dedi Zelenskiy.

Ukrainaning YIga kirish jarayoni 2024-yil iyulidan beri, ya’ni Kengashga raislik Vengriyaga o‘tganidan buyon boshi berk ko‘chaga kirib qolgan edi. Viktor Orban hukumati muzokaralarning birorta klasterini ochishga yo‘l qo‘ymadi.

Biroq endi vaziyat o‘zgarmoqda. 90 milliard yevrolik yordamning tasdiqlanishi muhim qadam bo‘ldi. Navbatdagi bosqich – a’zolik muzokaralarining birinchi blokini ochish bo‘lishi mumkin.