“Россия ҳар ой 30-35 минг аскаридан айрилмоқда” – Зеленский

Кипрда бўлиб ўтаётган норасмий саммитда Володимир Зеленский Украинани қўллаб-қувватлаш бўйича Европа ёрдам пакети ҳамда Россияга қарши 20-санкциялар пакети учун барча Европа етакчиларига миннатдорчилик билдирди.

Ушбу 90 миллиардлик ёрдам маблағларига армия учун қурол-яроғ, жумладан, ҳаво ҳужумидан мудофаа тизимлари сотиб олинади.

Зеленский америкаликлар айрим чекловларни енгиллаштирган бир пайтда Россияга қарши санкцияларни давом эттиришни сўради.

Президент фронтда вазият ўзгаргани, позициялар аввалги ой ва йилларга нисбатан анча барқарорлашгани ва Россия ҳар ой камида 30-35 минг аскаридан айрилаётганини айтиб ўтди.

“Россия учун вазият оғир ва биз уларни дипломатияга мажбурлаш учун шароитни янада қийинлаштиришимиз керак”, – деди у.

Зеленскийнинг таъкидлашича, Украина айни пайтда Яқин Шарқ ва Форс кўрфази мамлакатлари билан фаол ҳамкорлик қилмоқда. Киев уларга нафақат дронлар, балки тўлақонли мудофаа тизимини таклиф этмоқда.

Украина етакчиси ҳозирда араб давлатлари билан “Шаҳед” дронларига қарши ҳамкорлик қилинаётгани каби, Европада ҳам интеграциялашган ягона мудофаа тизимини яратишни таклиф қилди. Бу тизим қирғоқ чизиқлари ва муҳим инфратузилмаларни тўлиқ ҳимоя қилади.

Турғун музокаралар даври тугадими?

Зеленский саммитга бориш чоғида журналистларга интервью берар экан, Украина Европа Иттифоқига тўлақонли аъзо бўлиши шартлигини билдирди.

“Украина ўзини ва шу билан бирга Европани ҳам ҳимоя қилмоқда. Бу рамзий ҳимоя эмас – у ерда одамларимиз қурбон бўляпти”, – деди Зеленский.

Украинанинг ЙИга кириш жараёни 2024 йил июлидан бери, яъни Кенгашга раислик Венгрияга ўтганидан буён боши берк кўчага кириб қолган эди. Виктор Орбан ҳукумати музокараларнинг бирорта кластерини очишга йўл қўймади.

Бироқ энди вазият ўзгармоқда. 90 миллиард евролик ёрдамнинг тасдиқланиши муҳим қадам бўлди. Навбатдаги босқич – аъзолик музокараларининг биринчи блокини очиш бўлиши мумкин.