Maymun chechakka qarshi ikkinchi vaksina ishlab chiqildi

Qayd etilishicha, mazkur vaksina Yaponiyaning KM Biologics kompaniyasi tomonidan ishlab chiqilgan. Ushbu emlash vositasi "LC16m8" deb nomlangan. 

Joriy yilning sentabr oyida foydalanish uchun ruxsat etilgan daniyaning Bavarian Nordic A/S kompaniyasiga tegishli "MVA-BN" nomli ilk emlash preparati 18 yoshdan oshganlarda qoʻllashga moʻljallangan edi.

"Yaponiyada ishlab chiqarilgan yangi vaksinani esa nafaqat kattalar, balki bir yoshdan oshgan bolalar ham favqulodda holatlarda qabul qilishi mumkin", deyiladi SSV xabarida.

JSST bayonotida aytilishicha, Yaponiya hukumati maymun chechagi epidemiyasi avj olgan Kongo Demokratik Respublikasiga ushbu vaksinadan 3 million dozasini begʻaraz yordam sifatida yetkazib berishga qaror qilgan. 

Maʼlumot uchun, sentabr oyida dunyo boʻyicha mpox infeksiyasiga chalinish holatlari rekord darajaga yetib, 2763 ta yangi kasallanish holati roʻyxatga olingan. Aniqlangan bemorlarning asosiy qismi Afrika mintaqasi aholisi hissasiga toʻgʻri keladi.