Moskvadagi Crocus City Hall musiqa zalida sodir etilgan terakt qurbonlari soni 137 kishiga yetdi

Bundan tashqari, matbuot xizmati xabariga koʻra, fojia joyidan hujumchilarga tegishli toʻrtta jangovar moslama, 500 dan ortiq patron hamda ikkita Kalashnikov avtomati olib ketilgan.

Tergov qoʻmitasi, shuningdek, toʻrt nafar gumonlanuvchini hibsga olish choralarini koʻrishini maʼlum qildi.

22-mart oqshomida Moskva yaqinidagi Krasnogorsk shahridagi Crocus City Hall musiqa zalida terakt sodir etildi. Oxirgi maʼlumotlarga koʻra, qurbonlar soni 137 kishini tashkil etadi, biroq raqamlar yana ortishi mumkin. Moskva viloyati sogʻliqni saqlash vazirligi maʼlumotlariga koʻra, 180 kishi jarohat olgan. Teraktga aloqador boʻlgan 11 nafar gumonlanuvchi, jumladan, Ukraina chegarasi tomon yoʻl olishga uringan toʻrt nafar qotil ham qoʻlga olindi. Prezident Vladimir Putin telemurojaatida, dastlabki maʼlumotlarga koʻra, Ukraina tomoni terrorchilarning kesib oʻtishi uchun chegarada “boʻshliq” tayyorlayotganini aytdi. U Crocus City Hall'ga hujum uyushtirganlarning barchasini aniqlash va javobgarlikka tortishga vaʼda berdi va 24-martni butun mamlakat boʻylab motam kuni deb eʼlon qildi.