Quruvchilarning makkarona shartnomalari fosh etildi

Raqobat qoʻmitasi tekshiruvlari ayrim qurilish kompaniyalari tuzayotgan shartnomalar xaridorlar manfaatlarini himoya qilmayotganini koʻrsatdi. Qoʻmita maʼlumotiga koʻra, bu kabi shartnomalar asosan quruvchilar foydasiga xizmat qilgan.

Qariyb 130 ta quruvchi–isteʼmolchi shartnomasi ekspertizadan oʻtkazilib, ularning aksariyatida qonun talablariga zid va isteʼmolchi huquqlarini cheklovchi bandlar mavjud ekani maʼlum boʻldi.

Aniqlanishicha, koʻp holatlarda shartnomalarga uyni oʻz vaqtida topshirmaganlik uchun penya, kafolat muddati hamda nuqsonlarni bartaraf etish majburiyatlari kiritilmagan. Shu bilan birga, xaridor shartnomani bekor qilgan taqdirda, toʻlangan mablagʻni qaytarish muddati asossiz ravishda 30 kundan 3 yilgacha etib belgilangan.

Ayrim holatlarda esa shartnomalarni toʻgʻridan-toʻgʻri quruvchi kompaniya emas, balki “agent” yoki “tijorat vakili” sifatida boshqa shaxslar imzolagan. Bu esa muammo kelib chiqqan taqdirda haqiqiy quruvchining javobgarlikdan qochishiga olib kelgan.

Ushbu qoidabuzarliklar va sifatsiz qurilishlar boʻyicha kelib tushgan 1 700 dan ortiq murojaat asosida Raqobat qoʻmitasi quruvchilardan 22,1 milliard soʻm mablagʻni fuqarolar foydasiga qayta hisob-kitob qildirdi. Shuningdek, ruxsat hujjatlarisiz uy-joylarni reklama qilgan kompaniyalarga nisbatan moliyaviy jarimalar qoʻllanildi.

Raqobat qoʻmitasi fuqarolarni uy xarid qilishdan oldin shartnomani malakali huquqshunos bilan koʻrib chiqishga hamda quruvchi haqidagi maʼlumotlarni “Shaffof qurilish” tizimi orqali tekshirishga chaqirdi.