СИ пойгаси: Хитойнинг DeepSeek компанияси янги моделларини тақдим этди

Жума куни Хитой DeepSeek компанияси сунъий интеллектга асосланган машҳур чатботининг сўнгги версиялари -  DeepSeek-V4-Pro ва DeepSeek-V4-Flash моделларининг илк синов версияларини ишга туширди. 

Компания ушбу моделлар орқали OpenAI ва Google каби АҚШнинг технологик гигантлари билан тенгма-тенг рақобатлашишга қодир эканини яна бир бор намойиш этмоқда.

DeepSeekнинг аввалги чатботлари каби, V4-Pro ва V4-Flash моделлари ҳам очиқ манбали тизимга асосланган. Бу эса дастурчиларга уларнинг кодларидан эркин фойдаланиш ва ўз хоҳишларига кўра ўзгартириш имконини беради.

DeepSeek расмий баёнотида таъкидлашича, DeepSeek-V4-Pro математика ва дастурлаш йўналишларида барча очиқ манбали моделдаги рақобатчиларидан ўзиб кетади.

Умумий билимлар даражаси бўйича эса у фақатгина Googleнинг ёпиқ модель ҳисобланган Gemini 3.1-Pro тизимидан бироз ортда қолмоқда.

Хитой стартапининг қайд этишича, "Pro"нинг самарадорлиги OpenAIнинг GPT-5.4 ва Gemini 3.1-Pro моделларидан озгина фарқ қилади. Яъни компаниянинг ривожланиш суръати дунёнинг энг илғор моделларидан бор-йўғи 3-6 ой ортда қолмоқда.

Фирма вакилларининг сўзларига кўра, Flash модели Pro версиясига каби “фикрлаш” қобилиятига эга бўлиб, тезроқ жавоб қайтаради ва фойдаланиш учун анча ҳамёнбоп нархларни таклиф қилади.

Ушбу янги моделлар ўтган йилнинг январь ойида технология оламини ҳайратда қолдирган DeepSeek-R1 дебютидан сўнг эълон қилинди. Ўшанда R1 ўзининг имкониятлари ChatGPT ва Gemini билан деярли бир хил даражада эканини кўрсатган эди.

Хитойда яратилган DeepSeek-Р1 моделнинг алоҳида эътибор қозонишига яна бир сабаб, уни ишлаб чиқувчилар сўзларига кўра, ҳисоблаш ишларига 6 миллион доллардан кам маблағ сарфланган. Одатда, бундай лойиҳалар учун бир неча миллиард доллар ажратилади.

Кўпчилик таҳлилчилар бунга шубҳа билан қараб, DeepSeek эълон қилинганидан кўра кўпроқ молиявий маблағ ва анча илғор чипларга эга эканлигини айтишмоқда.

DeepSeekнинг халқаро майдонга чиқиши маълумотлар ҳимояси ва Хитой ҳукумати цензурасидан хавфсираётган қатор давлатларнинг эътирозларига сабаб бўлди.

АҚШнинг бир нечта штатлари, Австралия, Тайван, Жанубий Корея, Дания ва Италия махфийлик ҳамда миллий хавфсизликка доир хавотирларни сабаб қилиб, DeepSeek-Р1 моделига нисбатан чекловлар жорий этди.

Stanford AI Index 2026 ҳисоботига кўра, АҚШ Кремний водийсида энг илғор моделларни яратиш бўйича ҳамон устунликни сақлаб қолаётган бўлса-да, Хитой компаниялари америкалик рақобатчилари билан сунъий интеллект самарадорлиги борасидаги тафовутни амалда “тугатди”.

АҚШ юқори даражадаги сунъий интеллект моделлари ва “кучли таъсирга эга патентлар”ни кўпроқ яратмоқда, бироқ Хитой манбалар ҳажми, ҳаволалар сони, патентлар миқдори ва саноат роботларини ишлаб чиқиш бўйича етакчилик қилмоқда.