Янги Тошкентга кўчиш: давлат идоралари бинолари аукционга чиқарилди

E-auksion платформасида эълон қилинган лотлар орасида вазирликлар, агентликлар, ҳокимликлар ҳамда олий таълим муассасаларига тегишли йирик объектлар мавжуд.

Жумладан:

• Камбағалликни қисқартириш ва бандлик вазирлигининг маъмурий биноси — 180 млрд сўм;
• Техник жиҳатдан тартибга солиш агентлигининг маъмурий биноси — 279,8 млрд сўм;
• Бектемир тумани ҳокимлиги биноси — 40,1 млрд сўм;
• “Ўзбекипаксаноат” уюшмаси маъмурий биноси — 70,1 млрд сўм;
• Шайхонтоҳур тумани ҳокимлиги биноси — 101,6 млрд сўм;
• Агросаноат мажмуи устидан назорат қилиш инспекцияси биноси — 73,4 млрд сўм;
• Низомий номидаги Тошкент давлат педагогика университетининг Чилонзор туманидаги асосий ўқув бинолари — 886,6 млрд сўм бошланғич нарх билан савдога чиқарилган.

Шунингдек, университетнинг бошқа туманларда жойлашган факультет бинолари ҳам алоҳида лотлар сифатида сотувга қўйилган.

Маълум қилинишича, объектлар сотилган тақдирда ҳам амалдаги фойдаланувчилар биноларни дарҳол бўшатмайди. Шартларга кўра, давлат ташкилотлари биноларни 3 йил ичида ёки Янги Тошкентдаги янги маъмурий мажмуалар муддатидан олдин қуриб битказилса, белгиланган вақтдан аввал бўшатиб бериши мумкин.

Ушбу жараён давлат идораларини босқичма-босқич Янги Тошкент шаҳрига кўчириш дастури доирасида амалга оширилмоқда.