АҚШ Европадан воз кечиши мумкин – Трамп

Оқ уйда журналистлар 19 октябрь куни Канзас штатидаги сайловолди митингида айтилган баёнотга изоҳ беришни сўради. Журналист Трампдан АҚШ Европани «ташлаб кетиши» мумкинлиги ҳақидаги гапларини аниқлаштиришни сўраганида, у бу фикрини тасдиқлади.

«Ҳа, ташлаб кетиши мумкин», – деди Америка президенти.

Шу билан бирга, Трамп бундай вазиятда Вашингтон қандай амалий чоралар кўриши мумкинлигини очиқламади. Унинг айтишича, Европа ўз хатти-ҳаракатларини ўзгартириши керак.

«Биз ёрдам беришни хоҳлаймиз. Улар билан бирга бўлишни истаймиз», – деди у. Бироқ Европа ҳозирги йўлидан боришда давом этса, яқин келажакда унинг бугунги қиёфаси сақланиб қолмаслиги мумкинлигини таъкидлади.

Трамп Франция, Буюк Британия, Испания ва Италиядаги миграция назорати билан боғлиқ муаммоларни ҳам тилга олди. Унинг фикрича, ноқонуний равишда мамлакатга кирган шахсларни чиқариб юбориш зарур, акс ҳолда Европа Иттифоқининг келажаги хавф остида қолиши мумкин.

Бир кун аввал ҳам Америка президенти оммавий миграция масаласига тўхталиб, Европа тез орада ўз йўлини топиши кераклигини айтган эди. Акс ҳолда, унинг таъкидлашича, АҚШнинг Европани тарк этишдан бошқа чораси қолмаслиги мумкин.

Айрим америкалик кузатувчилар Трампнинг бу баёнотларини АҚШнинг яқин истиқболда НАТО таркибидан чиқиши эҳтимолига ишора сифатида ҳам талқин қилган.