Исроил Фаластинликлар учун ўлим жазоси қонунини қабул қилди

Қонунга кўра:
— ҳарбий судлар фаластинликларга нисбатан ўлим жазосини қўллаши мумкин;
— айрим ҳолатларда умрбод қамоқ жазоси ҳам белгиланиши мумкин.

Бу ҳақда Reuters хабар берди.

Қонун ҳозирча фақат фаластинликларга нисбатан қўлланиши айтилмоқда, бу эса танқидларга сабаб бўлмоқда. Фаластин президенти Маҳмуд Аббос ушбу қарорни халқаро ҳуқуққа зид ва фаластинликларга босим деб атади.

Қонун халқаро миқёсда ҳам танқид қилинмоқда. Германия, Франция, Италия ва Буюк Британия ҳукуматлари уни камситувчи деб баҳолади. Amnesty International эса ўлим жазоси жиноятларни камайтиришда самарали эмаслигини таъкидлади.

Тарихий маълумот: Исроилда ўлим жазоси 1954 йилда бекор қилинган. Шундан сўнг фақат бир марта — 1962 йилда нацист жиноятчиси Адолф Эйчман қатл этилган.

Қонун Итэмар Бен Гвир томонидан илгари сурилган. Унинг асосий мақсади — ҳужумларнинг олдини олиш. Бироқ танқидчилар “терроризм” тушунчаси аниқ белгиланмагани ва адолатсиз ҳукмлар хавфи борлигини таъкидламоқда.

Маълумот учун: дунёда 54 та давлатда ўлим жазоси амалда, 113 та давлат эса уни бекор қилган.

Муаллиф: Элнура Юсуфбекова