Kiyev urushni tugatish uchun diplomatik sa’y-harakatlarni kuchaytirishga intilmoqda

Ukraina prezidenti payshanba kuni o‘z mamlakati vakillariga Rossiya taklif qilgan o‘t ochishni to‘xtatish tafsilotlariga aniqlik kiritish uchun AQSH prezidenti Donald Tramp jamoasi bilan bog‘lanishni buyurganini ma’lum qildi.

Zelenskiy X ijtimoiy tarmog‘ida bergan bayonotida Kiyev Ukrainadagi to‘rt yillik urush fonida tinchlikka intilayotgani va mojaroni tugatish uchun zarur diplomatik ishlarni olib borayotganini aytdi.

“Gap nima haqida ketayotganiga – Moskvadagi parad uchun bir necha soatlik xavfsizlik ta’minotimi yoki bundan jiddiyroq narsami – aniqlik kiritamiz. Bizning taklifimiz – bu uzoq muddatli sulh, odamlar uchun ishonchli va kafolatlangan xavfsizlik hamda mustahkam tinchlikdir”, – deya ta’kidladi u.

Uning qo‘shimcha qilishicha, Ukraina tomoni bu yo‘nalishda har qanday munosib va samarali shaklda ishlashga tayyor.

Chorshanba kuni Rossiya prezidenti Vladimir Putin Tramp bilan telefon orqali muloqot chog‘ida G‘alaba kuni nishonlanishi munosabati bilan 9-may kuni Ukrainada o‘t ochishni to‘xtatish taklifini bildirdi.

“Tramp bu tashabbusni faol qo‘llab-quvvatlab, ushbu bayram Ikkinchi jahon urushida fashizm ustidan qozonilgan umumiy g‘alabamizni yodga solishini ta’kidladi”, – dedi Rossiya prezidenti yordamchisi Yuriy Ushakov.

Ayni paytda Tramp Oq uydagi jurnalistlarga telefon suhbati davomida Putinga “o‘t ochishni bir oz to‘xtatishni taklif qilganini” va uning fikricha, Putin “shunday qilishi mumkinligini” aytdi.