Трамп Россия нефти бўйича санкция имтиёзини узайтириши мумкин

Бу ҳақда вазиятдан хабардор манбаларга таяниб Reuters хабар берди.

Маълум қилинишича, АҚШ Молия вазирлиги март ойи ўрталаридан бошлаб денгиз орқали ташиладиган Россия нефтини сотиб олишга 30 кунлик вақтинчалик имтиёз жорий этган эди. Ушбу рухсатнома муддати 11 апрель куни тугаши кутилмоқда.

Бу чора АҚШ ва Исроилнинг Эронга қарши ҳаракатлари фонида глобал энергия нархларини назорат қилиш мақсадида амалга оширилган.

100 миллион баррель нефть бозорга қайтиши мумкин

Россия президентининг махсус вакили Кирилл Дмитриев ушбу қарор Россиянинг 100 миллион баррель хом нефтини бозорга қайтариши мумкинлигини таъкидлади. Бу ҳажм деярли бутун дунёда бир кунда қазиб олинадиган нефть миқдорига тенг.

9 апрель куни АҚШ Молия вазирлиги котиби Скотт Бессент Оқ уйда Трамп билан учрашиб, мазкур имтиёзни узайтириш масаласини муҳокама қилган. Манбаларга кўра, бу ташаббус “яхши ғоя” сифатида баҳоланган.

Ҳозирча Оқ уй ва Молия вазирлиги бу борада расмий изоҳ бермаган.

Трампнинг асосий хавотири — нефть нархлари

Эрон билан боғлиқ кескинлик ортидан нефть нархлари сезиларли даражада ошди. Бунга дунё нефть ва газ таъминотининг тахминан 20 фоизи ўтадиган Ҳўрмуз бўғозидаги вазият сабаб бўлмоқда.

Ёнилғи нархининг ўсиши ноябрь ойида ўтадиган сайловлар арафасида Трамп ва Республикачилар партияси учун жиддий сиёсий муаммога айланиши мумкин.

Халқаро энергетика агентлиги Яқин Шарқдаги кескинликни тарихдаги энг йирик нефть таъминоти узилиши сифатида баҳолаган.

Санкциялар бўйича зиддият кучайиши мумкин

Россия нефтига берилаётган имтиёзлар Ғарб давлатларининг Москвани Украинадаги уруш учун даромад манбаларидан маҳрум қилишга қаратилган ҳаракатларини қийинлаштириши мумкин.

Бу қарор, шунингдек, Вашингтон ва унинг иттифоқчилари ўртасида келишмовчиликларни кучайтириши эҳтимолдан холи эмас. Хусусан, Урсула фон дер Ляйен Россияга қарши санкцияларни юмшатиш вақти эмаслигини таъкидлаган.