Медиа соҳасининг йирик форуми бошланди: “Олтин қалам” ғолиблари эълон қилинади

Оммавий ахборот воситалари учун контент тайёрлаш маркази ташаббуси билан ташкил этилган анжуманда мамлакатнинг етакчи журналистлари, блогерлари, вазирлик ва идоралар матбуот котиблари, медиа экспертлар ҳамда контент яратувчилар иштирок этмоқда.

Форум давомида миллий медиа соҳасининг бугунги ҳолати, ахборот маконидаги замонавий чақириқлар, миллий контент сифатини ошириш ва рақобатбардош медиани шакллантириш масалалари муҳокама қилинади.

Тадбирда Ўзбекистон Республикаси Президенти матбуот котиби Шерзод Асадовнинг чиқиши ҳам режалаштирилган. У медиа соҳасини янада ривожлантириш ва ахборот сиёсати бўйича муҳим йўналишларга тўхталиши кутилмоқда.

Шунингдек, форум доирасида жорий йилнинг 30 мартдан 26 июнга қадар мамлакат бўйлаб илк бор ташкил этилган “Медиа ҳафталик” лойиҳаси якунлари сарҳисоб қилиниб, энг фаол иштирокчилар тақдирланади.

Кун якунида журналистика соҳасидаги энг нуфузли танловлардан бири ҳисобланган “Олтин қалам” халқаро миллий мукофоти ғолиблари эълон қилинади. Шу билан бирга, медиа соҳаси ривожига муносиб ҳисса қўшган ижодкорларга давлат мукофотлари ҳам топширилади.

27 июнь муносабати билан ўтказилаётган мазкур тадбир профессионал мулоқот, тажриба алмашиш ва медиа соҳасидаги йиллик натижаларни сарҳисоб қилиш учун муҳим майдонга айланди.