«Крокус Сити Холл» теракти иши бўйича маҳкум ўз жонига қасд қилди

Бу ҳақда Россия Федерал жазони ижро этиш хизматининг Москва бошқармаси маълум қилди.

ОАВ маълумотларига кўра, ўз жонига қасд қилган шахс 37 ёшли Якубджони Юсуфзода бўлган.

Хабарларда айтилишича, у "Матросская тишина" тергов ҳибсхонасида ўз жонига қасд қилган. Маҳкум шифохонага олиб борилган, аммо шифокорлар уни қутқара олмаган.

Россия федерал жазони ижро этиш хизмати (ФСИН) маълумотига кўра, ҳодиса кузатув камералари орқали аниқланган ва ҳолат юзасидан текширув ишлари бошланган.

Айбловлар ва суд ҳукми

Тергов материалларига кўра, Юсуфзодага тегишли банк картаси орқали теракт молиялаштирилган. Унинг ўзи бу ҳақда билмаганини билдирган.

Шунингдек, у радикал ғоялар тарқатиладиган каналларда иштирок этган ва администратор топшириқларини бажаргани айтилган.

2026 йил 12 март куни суд Юсуфзода ва яна 14 нафар айбланувчини умрбод қамоқ жазосига ҳукм қилган. Қолган шахсларга эса 19 йилдан 22,5 йилгача қамоқ жазолари тайинланган.

Теракт ҳақида

"Крокус Сити Холл" теракти 2024 йил 22 март куни Москва вилояти Красногорск шаҳрида содир бўлган.

Қуролланган шахслар концертга келган одамларга ўқ узган. Оқибатда 147 киши ҳалок бўлган, 3 киши бедарак йўқолган, 336 нафар фуқаро жароҳат олган. 600 дан ортиқ киши жабрланган, деб топилган.