577 миллион сўм алимент ундирилди - Омбудсман

Ўзбекистон Республикаси Олий Мажлиси Инсон ҳуқуқлари бўйича вакили (омбудсман) 2025 йилнинг 9 ойлигида амалга оширилган ишлар юзасидан ҳисобот тақдим этди.

Омбудсман ахборотига кўра:

• Фуқаролар фойдасига 9 млрд 327 млн сўмдан ортиқ маблағ ундирилди. Шундан 2 млрд 162 млн сўмга яқини меҳнат муносабатлари ва иш ҳақи бўйича.
• 25 нафар фуқарони ишга тиклаш ва ишга жойлаштириш тўғрисидаги мурожаатлар ижобий ҳал қилинди.
• 11 та ҳолатда иш берувчиларнинг ноқонуний хатти-ҳаракатлари бартараф этилди.
• Хотин-қизлар ва болалар манфаати учун 577 млн сўмдан ортиқ алимент ундирилиши таъминланди. Алимент тўлашдан бош тортган 3 нафар ҳуқуқбузарга маъмурий қамоқ тайинланди.
• Ер участкалари олиб қўйилиши билан боғлиқ ҳолларда 3,6 млрд сўмдан ортиқ компенсация фуқаролар фойдасига ундирилишда ёрдам кўрсатилди.
• Мурожаатларни ўрганиш натижасида инсон ҳуқуқларини бузган 33 нафар масъул ходимга интизомий ва маъмурий жавобгарлик чоралари қўлланди.
• Омбудсман ва унинг ҳузуридаги Жамоатчилик гуруҳлари томонидан ҳаракатланиш эркинлиги чекланган шахслар сақланадиган жойларга 728 маротаба мониторинг ташрифлари амалга оширилди.

Омбудсман институти жорий йилда ҳам фуқаролар ҳуқуқларини ҳимоя қилиш ва адолатни таъминлашга қаратилган ишларини изчил давом эттирмоқда.