Америкалик сайёҳнинг Ўзбекистондан чиқиб кетишида муаммо юзага келдими?

У ўзининг бошқарувидаги “Lamborjini” русумли машинасида чегарадан ўтказилмаётгани ҳақида гапирган.

Божхона қўмитаси матбуот хизматига кўра, сайёҳ автомобилининг Ўзбекистонда бўлиш муддатини салкам 2 ойга ўтказиб юборган. Шу боисдан автотранспорт воситасини олиб чиқишга тақиқ қўйилган.

“Бир неча дақиқалар олдин у белгиланган тартибида 23 млн 72 минг сўм миқдоридаги йиғимни тўлади ва маъмурий жавобгарликдан озод этилди. Хорижий шахс ўзининг автотранспорт воситасида Ўзбекистондан кузатиб қўйилди”, — дейилади Божхона қўмитаси хабарида.

Маълум бўлишича, хорижлик сайёҳ шу йилнинг 2 май куни Ўзбекистонга кириб келган. Ўзбекистон қонунчилигига биноан хорижий мамлакат фуқаролари автотранспорт воситалари билан Ўзбекистонда 90 кун эмин-эркин ҳаракатланиши мумкин. АҚШ фуқароси 2 август куни чиқиб кетиши керак бўлган лекин у сентябрь ойининг охирида чиқиб кетишга ҳаракат қилган.

“Хорижий шахс бевосита банк шохобчасига борган ҳолда валюта алмаштириш ва пул нақд қилиш каби банк амалиётларини дам олиш кунларида амалга ошира олмагани сабабли мазкур жараённи бугун якунига етказди”, — дейилади қўмита хабарида.