Ангренда зўравонликка учраган 15 ёшли қизнинг аҳволи ҳақида хабар берилди

Болалар омбудсмани Ангрен шаҳрида зўравонликка учраган 15 ёшли қизнинг соғлиги ва психологик ҳолатини ўрганиш мақсадида Республика ихтисослаштирилган илмий-амалий тиббиёт марказига ташриф буюрди. Маълум қилинишича, қизнинг умумий аҳволи аввалгига нисбатан яхшилангани қайд этилган.

Омбудсман вояга етмаган Й.С. билан холи суҳбат ўтказиб, унинг саломатлиги, оила аъзоларига бўлган ишончи ҳамда келажакда ким билан яшашни исташи борасидаги фикрларини эшитди. Қиз соғломланиш жараёнида бўлиб, тана вазни ошгани ва умумий ҳолатининг барқарорлашгани маълум қилинганди.

Мутахассисларнинг хулосасига кўра, Й.С. психолог билан мунтазам ишламоқда ва унинг руҳий ҳолатида сезиларли ижобий ўзгаришлар кузатилмоқда. У ҳозирда посттравматик тикланиш жараёнининг фаол босқичида. Шу боис, даволаниш тугагач, қизни нейтрал ҳамда хавфсиз оилавий муҳитга жойлаштириш мақсадга мувофиқ экани билдирилди.

Болага нисбатан содир этилган жиноят бўйича тергов якунланиб, иш судга юборилган. Мазкур иш ҳозирда суд муҳокамаси босқичида.

Болалар омбудсмани вояга етмаган қизнинг манфаатларини таъминлаш мақсадида суд жараёнида иштирок этиши, шунингдек, қизни хавфсиз муҳитга жойлаштириш бўйича жараённи назорат қилишни давом эттиришини маълум қилди.