АҚШдаги отишма қурбонлари орасида ўзбекистонлик талаба ҳам бор

Бу ҳақда Ўзбекистон Ташқи ишлар вазирлиги маълум қилди.

Фожиа 13 декабрь куни содир бўлган. Дастлабки маълумотларга кўра, отишма оқибатида икки нафар талаба ҳалок бўлган, яна тўққиз киши турли даражада жароҳат олган.

МуҳаммадАзиз Умурзоқовнинг вафоти ҳақида биринчи бўлиб унинг оила аъзолари GoFundMe платформасида эълон қилинган мурожаат орқали хабар берган. Кейинчалик бу маълумот Ўзбекистон ТИВ матбуот котиби томонидан ҳам расман тасдиқланди.

Марҳумнинг яқинларига кўра, МуҳаммадАзиз келажакда нейрохирург бўлишни орзу қилган, инсонларга ёрдам беришни ҳаётининг асосий мақсади деб билган.

«У ниҳоятда меҳрибон, хушчақчақ ва ақлли эди. Ҳар доим ёрдамга муҳтож инсонларга иккиланмасдан қўл узатарди. Оиламиз бу оғир йўқотишни чуқур изтироб билан қабул қилмоқда», — дейилади GoFundMe саҳифасида қолдирилган мурожаатда.

Ҳозирга қадар платформа орқали 3 мингдан ортиқ фойдаланувчи оилани қўллаб-қувватлаш мақсадида қарийб 135 минг доллар хайрия қилган.

Ўзбекистон ТИВ маълум қилишича, АҚШдаги дипломатик ваколатхоналар марҳумнинг оила аъзолари билан доимий алоқада бўлиб, маҳаллий идоралар билан ҳамкорликда барча ташкилий масалалар юзасидан иш олиб бормоқда.

Шунингдек, Америка–Ўзбекистон ассоциацияси ҳам МуҳаммадАзиз Умурзоқовнинг оиласига ҳамдардлик билдирди. Маълумотларга кўра, у АҚШда улғайган, Виржиния штатидаги Мидлотиан шаҳрида мактабни тамомлаган.

Эслатиб ўтамиз, мазкур отишма бўйича 24 ёшли Висконсин штати фуқароси Бенжамин Эриксон қўлга олинган. Ҳодиса юзасидан тергов ишлари давом этмоқда.