Давлат идоралари кўчиши ортидан бинолар сотилмоқда

 Сўнгги кунларда кетма-кет ўтказилган учта савдо натижалари давлат мулкининг ҳақиқий бозор баҳосини, шунингдек, ушбу жараёнда фаол иштирок этаётган хусусий компаниялар манфаатини яққол намоён этди.

Қурилиш ва коммунал хўжалик вазирлиги биноси — 182,4 миллиард сўм

Абай кўчасида жойлашган, 48 сотих майдонни эгаллаган Қурилиш ва коммунал хўжалик вазирлиги биноси бўйича аукцион тўрт иштирокчи ўртасида ўтди. Бошланғич нарх 130,3 миллиард сўм этиб белгиланган эди.

Савдода ғолибликни “Ўзшаҳар қурилиш инвест” компанияси қўлга киритди ва бино 182,4 миллиард сўмга сотилди.

2017 йилда Миробод туманида рўйхатдан ўтган ушбу компания турар жой қурилиши билан шуғулланади. Компаниянинг 100 фоиз улуши Нуриддин Қодировга тегишли, бошқарув эса Бахтиёр Саатов зиммасида. Аукцион материалларига кўра, харидор Президентнинг 2019 йилдаги фармони асосида берилган имтиёзлардан фойдаланиб, объект учун тўловни 36 ой давомида бўлиб-бўлиб амалга ошириш ҳуқуқига эга бўлган.

Транспорт вазирлиги биноси — 187,7 миллиард сўм

Навбатдаги лот — Зулфияхоним кўчасида жойлашган Транспорт вазирлиги биноси бўлди. 62 сотих майдонга эга ушбу объект учун бошланғич нарх 110,4 миллиард сўм этиб белгиланди.

Уч иштирокчи ўртасидаги савдо бир соатдан ортиқ давом этди ва нарх 14 марта оширилди. Якунда бино 187,7 миллиард сўм таклиф қилган Қорақалпоғистондаги “Самарадор” компаниясига сотилди.

2017 йилда ташкил этилган ушбу компания 25 миллиард сўм устав капиталига эга. Унинг асосчиси Бахтиёр Махкамов бўлиб, у пойтахтда фаолият юритаётган яна бир қатор қурилиш корхоналарининг ҳам эгаси ҳисобланади.

Автомобиль йўллари қўмитаси биноси — 242 миллиард сўм

18 декабрь куни ўтказилган навбатдаги аукцион энг йирик сумма билан ёдда қолди. Мирзо Улуғбек туманида, Ҳамид Олимжон метро бекати яқинида жойлашган, 1975 йилда қурилган ва 1 гектардан ортиқ майдонни эгаллаган Автомобиль йўллари қўмитаси биноси 242 миллиард сўмга сотилди.

Энг юқори таклифни Қобилжон Норбеков билдирган. Харид муддатли тўлов асосида амалга оширилади.

Маълум қилинишича, қўмита Янги Тошкентга кўчиб ўтишни режалаштирмоқда ва уч йил ичида бинoни тўлиқ бўшатиб бериш мажбуриятини олган. Агар янги маъмурий бино белгиланган муддатдан олдин тайёр бўлса, мавжуд бино харидорга шунга мувофиқ равишда эртароқ топширилади.

Марказдан чекиниш — йирик хусусий инвесторлар учун имконият

Учта аукцион якунларига кўра, давлат мулки ҳисобланган бинолар жами ҳисобда 612 миллиард сўмдан ортиқ суммага сотилди. Харидорларнинг аксарияти қурилиш соҳаси вакиллари бўлиб, улар пойтахт марказида катта ер майдонларига эга бўлиш имкониятидан фойдаланмоқда.

Давлат идораларининг Янги Тошкентга кўчирилиши жараёни эндигина бошланганини инобатга олсак, яқин ойлар ва йилларда бундай савдолар сони ортиши, пойтахт марказидаги кўчмас мулк эса бозорнинг энг қиммат активларидан бирига айланиши кутилмоқда.