Ўзбекистон нима сабабдан «Тинчлик кенгаши»га қўшилди?

Президент маслаҳатчиси, собиқ ташқи ишлар вазири Абдулазиз Комилов Ўзбекистоннинг «Тинчлик кенгаши»га аъзо бўлишига нима сабаб бўлгани ҳамда ушбу ташаббусдан кўзланаётган мақсад ва манфаатлар ҳақида изоҳ берди.

Унинг таъкидлашича, Ўзбекистон ушбу ташаббусни қўллаб-қувватлашга қарор қилган, чунки Яқин Шарқдаги вазият мамлакат хавфсизлигига бевосита таъсир кўрсатади. Шу боис бу борада халқаро ҳамкорлик муҳим аҳамият касб этади.

Комиловнинг сўзларига кўра, «Тинчлик кенгаши» ташаббуси Ўзбекистон ташқи сиёсатининг асосий устувор йўналишлари — тинчлик, барқарорлик ва минтақавий хавфсизликни мустаҳкамлаш тамойилларига тўлиқ мос келади. Шунингдек, Яқин Шарқ минтақасида Ўзбекистоннинг муҳим стратегик манфаатлари мавжуд.

Президент маслаҳатчиси бир неча йил аввал Яқин Шарққа кетиб, турли экстремистик гуруҳлар сафига қўшилган, кейинчалик эса Ўзбекистонга қайтарилган фуқаролар масаласига ҳам тўхталиб ўтди. Унинг айтишича, ушбу шахслар ватанга қайтарилгандан сўнг, уларни жамиятга қайта мослаштириш ва ижтимоий ҳаётга интеграция қилиш учун зарур шароитлар яратилган.

«Бу борадаги инсонпарварлик сиёсати Бирлашган Миллатлар Ташкилоти раҳбарияти томонидан юқори баҳоланди. Уларнинг фикрича, Президентимиз олиб бораётган сиёсат кўплаб давлатлар учун намуна бўлиши мумкин. Бу эса Ўзбекистоннинг Яқин Шарқ минтақасида бошқа давлатлар билан ўзаро манфаатдор эканини ва энг аввало, ўз хавфсизлигини таъминлашга интилaётганини кўрсатади», — деди Комилов.

Шунингдек, у Яқин Шарқдаги беқарорликнинг Марказий Осиё хавфсизлигига таъсири ҳақида гапирар экан, Афғонистонда уруш бошланишидан аввал экстремистик гуруҳлар деярли мавжуд бўлмаганини, кейинчалик эса уларнинг асосан Яқин Шарқдан кириб келганини қайд этди.

Комиловнинг фикрича, минтақадаги муаммоларни ҳал этиш мураккаб ва узоқ давом этадиган жараён бўлиб, бунда халқаро ҳамжамиятнинг бирлашган ҳаракати зарур.

«Фақатгина АҚШ эмас, балки араб давлатлари, мусулмон мамлакатлари ва Марказий Осиё давлатлари биргаликда ҳаракат қилиши керак. Ҳар бир қадам пухта ўйлаб ташланса, тинчлик ва барқарорликни таъминлаш йўлида муҳим натижаларга эришиш мумкин. Ўзбекистон халқаро ҳамжамият билан ҳамкорликни изчил давом эттиради», — деди президент маслаҳатчиси.