Ўзбекистонликлар бўлган сайёҳлик катери ҳалокатга учради

Бу ҳақда Ташқи ишлар вазирлиги матбуот котиби Аҳрор Бурханов маълум қилди.

Маълум қилинишича, ҳодиса 11 январь куни содир бўлган. Дастлабки маълумотларга кўра, катер балиқчи траулери билан тўқнашиб, ағдарилиб кетган ва кейинчалик чўкиб қолган. Ҳалокат оқибатида 18 ёшли Россия фуқароси бўлган аёл ҳалок бўлган, 23 нафар россиялик сайёҳ турли даражадаги тан жароҳатлари билан шифохонага ётқизилган.

Катер бортида уч нафар Ўзбекистон фуқароси ҳам бўлган. Улардан икки нафари енгил тан жароҳати олган ва маҳаллий тиббиёт муассасасига жойлаштирилган. Ҳозирда жабрланган фуқаролар тўлиқ соғайган ва белгиланган тартибда шифохонадан чиқарилган.

Ташқи ишлар вазирлиги маълумотига кўра, жабрланганларнинг барча тиббий ҳамда бошқа зарур харажатлари катерга эгалик қилувчи компаниянинг суғурта маблағлари ҳисобидан тўлиқ қоплаб берилган.

Ҳодиса юзасидан Пхукет ва Краби провинциялари полицияси томонидан тергов ишлари олиб борилмоқда. Ҳалокат сабаблари аниқланмоқда.

Шунингдек, Ўзбекистон Республикасининг Бангкок шаҳридаги Бош консулхонаси маҳаллий ҳуқуқни муҳофаза қилувчи органлар ва соғлиқни сақлаш муассасалари билан доимий алоқада бўлиб келгани маълум қилинди.