Россия ОАВлари Мирзиёев самолётини “АҚШ ҳарбий самалёти” деб талқин қилди

Айрим нашрлар самалётни “ҳарбий самолёт” ёки “АҚШ ҲҲК самолёти” бўлиши мумкин, дея тахминларни илгари сурган.

Flightradar маълумотларига асосланган хабарларда самолёт Вашингтон яқинидаги Эндрюс авиабазасидан учгани, Мурманск вилояти устидан Россия ҳаво ҳудудига киргани ва маълум бир вақтдан сўнг кузатувдан йўқолгани айтилган. Баъзи манбалар эса самолёт Қозоғистон чегараси томон йўл олганини ёзган.

Маълум бўлишича, шов-шувга сабаб бўлган лайнер Ўзбекистон Президенти Шавкат Мирзиёевнинг расмий самолёти бўлган. Давлат раҳбари АҚШга ташрифидан сўнг “Тинчлик кенгаши”нинг биринчи саммитида иштирок этиб, Тошкентга қайтган.

Ҳукумат ва махсус рейслар ҳақидаги маълумотлар очиқ кузатув сервисларида доим ҳам тўлиқ акс этмайди. Очиқ манбаларга кўра, самолёт Вашингтондан Тошкент вақти билан 00:12 да учиб чиққан ва Канада, Гренландия, Европа давлатлари, Россия ҳамда Қозоғистон устидан парвоз қилиб, 12:14 да Тошкентга етиб келган.