Россия сафида урушда қатнашган андижонликка жазо тайинланди

Маълум бўлишича, Андижон шаҳрида истиқомат қилувчи И.Х. 2022 йил декабрь ойида ишлаш мақсадида Россия Федерациясига борган. У Москва ва Челябинск шаҳарларида “Яндекс” платформаси орқали етказиб бериш хизмати билан шуғулланган.

2023 йил январь ойида И.Х. гиёҳвандлик воситаларининг ноқонуний муомаласи билан боғлиқ жиноятда айбланиб, Челябинск шаҳар суди ҳукми билан 8 йил муддатга озодликдан маҳрум этилган.

Жазони ўташ давомида унга Россия ва Украина ўртасидаги қуролли тўқнашувларда қатнашиш эвазига жазодан қутулиш имконияти таклиф қилинган. Шу асосда у 2024 йил август ойида Россия Қуролли кучлари билан шартнома имзолаб, оддий аскар сифатида хизматга киришган.

И.Х. 2024 йил август–сентябрь ойларида Донецк шаҳри атрофида олиб борилган жангларда АК-74 ўқотар қуроли билан қатнашган. Жанглар давомида снаряд портлаши оқибатида оғир тан жароҳатлари олган.

Суд-тиббий экспертиза хулосасига кўра, айбланувчи умумий меҳнат қобилиятининг учдан бир қисмидан кўпроғини доимий равишда йўқотган. Унинг чап оёғига “Илизаров” аппарати ўрнатилган ва у Россияга қарашли ҳарбий госпиталларда узоқ вақт даволанган.

2025 йил сентябрь ойида И.Х. Ўзбекистон Республикасининг консуллик ҳужжатлари асосида Ватанга қайтган.

Жиноят ишлари бўйича Жалақудуқ туман суди И.Х.ни Жиноят кодексининг 154-моддаси 1-қисмида назарда тутилган жиноятни содир этганликда айбли деб топди. Суд унга 5 йил озодликдан маҳрум қилиш жазосини тайинлади, бироқ Жиноят кодексининг 72-моддасига асосан жазо шартли ҳисобланиб, 2 йил муддатга озодликни чеклаш (уй қамоғи) белгиланди.

Ўзбекистон қонунчилигига кўра, фуқароларнинг чет давлатлар ҳарбий хизматларида иштирок этиши жиноий жавобгарликка сабаб бўлади. Хусусан, Жиноят кодексининг 154 ва 154-1-моддаларига асосан бундай ҳаракатлар учун 5 йилдан 10 йилгача озодликдан маҳрум қилиш жазоси белгиланган.