Янги йил арафасида фирибгарлар фаоллашди: битта ҳавола орқали банк картангиздан айрилишингиз мумкин

Ушбу ҳаволаларни очган фойдаланувчиларнинг банк карталари ва шахсий маълумотлари фирибгарлар қўлига ўтиб кетиши мумкин. Бу ҳақда расмий манбалар ҳам огоҳлантирмоқда.

Мутахассислар таъкидлашича, замонавий киберфирибгарлик усуллари инсон ҳис-туйғулари билан манипуляция қилишга асосланган. Энди гап оддий .apk ёки .exe файллар ҳақида эмас. Фирибгарлар интерактив табрикка ўхшаш ҳаволалар юбориб, фойдаланувчини фишинг сайтга йўналтиради. Айрим ҳолларда “очилмаяпти” деган баҳона билан гўёки GIF ёки видео кўринишидаги файл юборилиб, уни кўриш учун “янгилаш” (обновление) таклиф қилинади.

Шунингдек, “етказиб бериш хизмати” номидан юборилган хабарлар орқали “янги йил совғасини олиш” учун иловалар ёки “юк хати”ни юклаб олиш талаб қилинаётган ҳолатлар ҳам кўпайган. Бундай файллар орқали қурилмага зарарли дастур ўрнатилади.

Фирибгарлик қурбони бўлмаслик учун нималарга эътибор бериш керак?

Киберхавфсизлик мутахассислари қуйидаги тавсияларни беради:

— Ҳар доим хабар манбасини текширинг. Юборувчи сизга таниш бўлмаса, ҳавола ёки файлни очманг.
— Файл форматларига диққат қилинг. Расм ёки видео сифатида ниқобланган файллар ҳам хавфли бўлиши мумкин. Хавфсиз форматлар: .jpg, .png, .gif, .mp4, .webm. Номаълум ва ишончсиз форматлардан сақланинг.
— Интернетда арзон нархда янги йил совғалари, озиқ-овқат ёки арча сотилиши ҳақидаги эълонларга ишониб, олдиндан тўлов қилманг. Кўп ҳолларда фирибгарлар пулни олгач, аккаунтни ўчириб йўқолиб қолади.

Байрамона кайфиятда ҳушёрликни йўқотмаслик — шахсий молиявий хавфсизликни сақлашнинг энг муҳим шарти ҳисобланади.