Янги йил байрамини нишонлаш учун бюджет пули ишлатилмайди

Қарорга кўра, вазирликлар, идоралар, вилоятлар ва Тошкент шаҳар ҳокимликлари, шунингдек давлат улуши 50 фоиздан кам бўлмаган хўжалик бирлашмаларига бюджет ҳамда бюджетдан ташқари маблағлар ҳисобидан Янги йил муносабати билан корпоратив тадбирлар ўтказиш ва байрам дастурхони ёзиш ман этилади.

Маълум қилинишича, мазкур чеклов давлат маблағларини мақсадсиз сарфлашнинг олдини олишга қаратилган. Шу билан бирга, давлат органлари ва ташкилотлари ходимлари ўз шахсий маблағлари — ойлик маоши ёки рағбат пуллари ҳисобидан, ишдан ташқари вақтда Янги йил тадбирларини ташкил этишлари мумкин.

Ушбу талаб давлатга қарашли бўлмаган тижорат ташкилотлари, хусусий фирмалар ва компанияларга тааллуқли эмас.

Қайд этиш жоизки, Ўзбекистонда аввалги йилларда ҳам бюджет маблағлари ҳисобидан Янги йил корпоратив байрамларини ўтказиш тақиқланган эди. 

“Бюджет пули — халқнинг пули. Унинг ҳар бир тийини ҳисобли. Халқимиз бу маблағларни бизнинг ўйин-кулги қилишимиз учун бермаган”, — дея таъкидлаган Бош вазир Абдулла Арипов.