ЙҲҚни бузганлик бўйича жарима хатларини етказиб бериш хизмати тўхтатилади

Ички ишлар вазирлиги маълум қилишича, йўл ҳаракати қоидаларини бузганлик учун расмийлаштириладиган маъмурий баённомалар (жарима хатлари)ни анъанавий тарзда етказиб бериш хизмати бекор қилинади. 

Қарор нусхаси ва унга илова қилинган материаллар қуйидаги электрон платформалар орқали юборилади:

• my.gov.uz портали (myGov мобил иловаси)
• SafeRoad мобил иловаси
• Road24 мобил иловаси
• Ягона интерактив давлат хизматлари мобил иловаси
• Hamroh мобил иловаси

Қарор расмийлаштирилгани заҳоти 6079 рақамидан СМС-хабарнома юборилади.

Агар СМС-хабарнома келмаса, фуқаролар my.gov.uz портали орқали ўз телефон рақамини рўйхатдан ўтказиши лозим. Шундан сўнг барча хабарномалар автоматик равишда етказилади.

Маълум қилинишича, мазкур рақамли хизматлардан фойдаланиш муддати чекланмаган. Қўшимча рўйхатдан ўтиш ёки ҳужжат тақдим этиш талаб этилмайди. 

Қарор расмийлаштирилган пайтнинг ўзида барча материаллар билан танишиш ҳамда қонунчиликда белгиланган муддатларда жаримани тўлаш имконияти мавжуд.