Қирғизистон Тожикистон билан 23 йиллик музокарасига нуқта қўйди

Ҳужжатни 85 депутат маъқуллаган, аммо 1 нафар парламент аъзоси унга қарши овоз берган. Шартнома 13 март куни Бишкекда Қирғизистон давлати раҳбари Садир Жапаров ва Тожикистон президенти Эмомали Раҳмон томонидан имзоланилган эди. 

Мазкур жараёнда Садир Жапаров икки мамлакат ўртасидаги чегара низоларини ҳал қилиш бутун минтақа хавфсизлигини мустаҳкамлашга ҳисса қўшишини айтган бўлса, Эмомали Раҳмоннинг чегара шартномасини имзолаш "тарихий қарор"га айланишини билдириб ўтган. 

Йигирма уч йилдан бери давом этаётган музокалар 

Қирғизистон ва Тожикистон ўртасидаги чегаранинг узунлиги тахминан 980 километрни ташкил этади. Уни делимитация қилиш бўйича музокаралар (давлат чегарасини белгилаш, унинг ўтишини тавсифлаш ва харитага тушириш) 2002 йил декабрь ойидан бери давом этиб келаётган эди. 

Ушбу масаланинг ҳал қилинмаганлигига бир неча бор икки Республиканинг маҳаллий аҳолиси ва ҳарбий хизматчилари томонидан ўқотар қуролдан фойдаланиш билан боғлиқ низолар сабаб бўлган. 2014 йилдан бери Қирғизистон – Тожикистон чегарасида жами 10 дан ортиқ жиддий можаролар юз берди. 

Қирғизистон Хитой, Қозоғистон, Ўзбекистон ва Тожикистон билан чегарадош. Айтиш мумкинки, Тожикистон шу пайтгача Қирғизистон барча чегара масалаларини ҳал қила олмаган сўнгги қўшни давлат бўлиб қолди. 

Тожикистон Қирғизистондан ташқари яна учта давлат билан умумий давлат чегараларига эга. Афғонистон билан чегара чизиғи энг узуни бўлиб, у билан чегара 1343 километрга чўзилган. Ўзбекистон ва Хитой билан мос равишда 1330 км ва 490 километрдан ортиқ чегара узунлиги мавжуд. 

Давлат чегарасини Ўзбекистон билан тўлиқ делимитация қилиш 2019 йилда якунланган эди, ҳозирда томонлар умумий чегара чизиғини демаркация қилиш бўйича ишларни давом эттирмоқда.