Москва ва Киев музокараларида Украина бўйича янги тинчлик ғоялари муҳокама қилинди

АҚШнинг махсус вакиллари Стив Уиткофф ва Жаред Кушнернинг Москва ва Киевга ташрифлари давомида Украинадаги можарони тинч йўл билан ҳал қилиш бўйича янги ғоялар муҳокама қилинди. Бу ҳақда АҚШ давлат котиби Марко Рубио маълум қилди.

«Мен уларни яхши ёки ёмон, самарали ёки самарасиз деб баҳоламоқчи эмасман. Фақат шуни айтишим мумкинки, музокаралар мазмунли ўтди. Уларда янги ғоялар муҳокама қилинди», — деган Рубио Колумбия пойтахти Боготада журналистларга берган интервюсида.

Унга кўра, Уиткофф ва Кушнернинг Москвадаги учрашувлари Россия ва АҚШ ўртасидаги мулоқотнинг муҳим босқичларидан бири бўлган.

Шанба куни Россия президенти Владимир Путин АҚШ вакилларини Кремлда қабул қилди. Учрашув 3 соат 10 дақиқа давом этди. Бу Вашингтон вакилларининг Россияга саккизинчи ташрифи бўлган.

Россия президенти ёрдамчиси Юрий Ушаковнинг билдиришича, Путин учрашув давомида фронтдаги вазиятга оид Россия томонининг позициясини батафсил баён қилган. АҚШ вакиллари эса олинган маълумотларни Киев билан мулоқотда инобатга олишларини билдирган.

Кейинги куни Америка делегацияси Киевга йўл олди. Уиткофф ва Кушнер Украина президенти Владимир Зеленский ҳамда Украина томони вакиллари билан музокаралар ўтказди.

Музокаралар икки босқичда бўлиб ўтди. Иккинчи раундда Буюк Британия, Германия ва Франциянинг миллий хавфсизлик бўйича маслаҳатчилари ҳам иштирок этди.

Шу билан бирга, Россия томони ушбу учрашувларни ўтказиш учун Киевга зарбаларни уч суткага тўхтатишга қарор қилганини маълум қилган.

АҚШ делегациясининг ташрифидан сўнг Путин АҚШ президенти Дональд Трамп билан музокаралар натижаларини муҳокама қилди. Кремль маълумотига кўра, икки томон Москва ва Киевдаги учрашувларга ижобий баҳо берган.

Путин Трампнинг Москва ва Вашингтон ўртасида конструктив ҳамкорликни ривожлантиришга қаратилган позициясини қўллаб-қувватлаган ҳамда Украинадаги можарони якунлаш учун АҚШ томони амалга ошириши мумкин бўлган қадамларни белгилаб берган.

Ҳозирча музокаралар якуни бўйича аниқ тинчлик келишуви ёки можарони тугатиш санаси эълон қилинмаган. Бироқ АҚШ вакилларининг Москва ва Киевда ўтказган учрашувлари музокара жараёнида янги таклифлар муҳокама қилинаётганини кўрсатмоқда.

Муаллиф: Ҳасанбой ОЧУН