50 минг еврога баҳоланган дарвозабон Жаҳон чемпионатида Испанияни ҳайратда қолдирди

Испания каби юлдузларга бой жамоага қарши баҳсда 40 ёшли дарвозабон рақибнинг кетма-кет ҳужумларини бартараф этиб, учрашув қаҳрамонига айланди. 

Статистикага кўра, у ўйин давомида камида еттита хавфли зарбани қайтариб, жамоасини мағлубиятдан сақлаб қолишга катта ҳисса қўшди.

Эътиборлиси, Transfermarkt маълумотларига кўра, Возиньянинг трансфер қиймати атиги 50 минг евро деб баҳоланган. Бу рақам Испания терма жамоаси футболчиларининг аксарияти билан таққослаганда юзлаб марта кам.

Болаликда ёқтирмаган лақаби унинг брендига айланди

Возиньянинг ҳаёт йўли ҳам оддий эмас.

У болалигида отаси ҳарбий хизматда, онаси эса иш билан банд бўлгани учун асосан буви ва бобоси тарбиясида ўсган. Шу сабабли атрофдагилар уни ҳазил тариқасида «Возинья» («Бувижон») деб чақиришган.

Аввалига у бу лақабни ёқтирмаган. Бироқ илк профессионал клубига боргач, айнан шу номни қабул қилди ва кейинчалик уни футболкасига ҳам ёздирди. Бугун эса айнан шу тахаллус унинг футболдаги шахсий брендига айланган.

Фаолиятини якунлашни ўйлаётганида мундиалга чақирилди

40 ёшли посбон фаолиятини якунлаш ҳақида ўйлаётган пайтда Кабо-Верде терма жамоасидан чақирув олди.

Жаҳон чемпионатида эса у тажриба, хотиржамлик ва ишончли ўйини билан миллионлаб мухлисларни ҳайратда қолдирди. Қимматбаҳо юлдузларга қарши кўрсатган ўйини туфайли у турнирнинг энг кўп муҳокама қилинаётган қаҳрамонларидан бирига айланди.

Онаси ҳам Жаҳон чемпионатига етиб келади

Возинья учун яна бир қувончли воқеа юз берди.

Кабо-Верде терма жамоаси маълум қилишича, футболчининг онаси АҚШ визасини олган ва Жаҳон чемпионатининг навбатдаги баҳси бўлиб ўтадиган Майами шаҳрига етиб келади.

Дарвозабон бу хабарни катта ҳаяжон билан қабул қилганини айтди.

«Онамни трибунада кўриш мен учун энг катта мотивация бўлади», — дея таъкидлаган у.

Якшанба куни бўлиб ўтадиган учрашувда Возиньяни илк бор онаси стадиондан туриб қўллаб-қувватлайди.

Футбол баъзан миллионлаб евролик юлдузлар ҳақида эмас, балки меҳнат, сабр ва орзулар орқали ёзилган инсон тақдирлари ҳақида ҳам эканини Возинья яна бир бор исботлади.