Омбудсман аралашувисиз маҳкумлар тиббий ёрдам ололмаяпти

Ўзбекистондаги жазони ижро этиш муассасаларида маҳкумларнинг соғлиқни сақлаш ҳуқуқини таъминлашда тизимли муаммолар мавжудлиги аниқланди. Мурожаатлар ва текширувлар натижаларига кўра, колонияларда тиббий ёрдам кўрсатишнинг оддий механизмлари самарали ишламаяпти, тор мутахассислар кўриги ёки шифохонага ётқизиш эса кўп ҳолларда фақат Омбудсман аралашувидан сўнг амалга оширилмоқда.

Хусусан, Жиззах вилоятидаги 29-сонли колонияда маҳкум бир неча кун давомида оғир аҳволда қолиб кетган. Фуқаролик шифохоналари уни қабул қилишдан бош тортган: бир муассаса тўлов талаб қилган бўлса, бошқасида пульмонолог йўқлиги айтилган. Фақат Омбудсманнинг ҳудудий вакилхонаси аралашувидан сўнг бемор Республика шошилинч тиббий ёрдам маркази реанимациясига жойлаштирилган.

Шу каби ҳолат Жиззах шаҳридаги тергов ҳибсхонасида ҳам қайд этилган. Шошилинч жарроҳлик амалиёти зарур бўлган шахс ихтисослаштирилган “Сангород” 23-сонли шифохонага фақат адвокатнинг ҳуқуқ ҳимоячиларга мурожаатидан кейин етказилган. У реанимобильда, шифокорлар ҳамроҳлигида олиб борилган.

Омбудсман аралашуви режали тиббий ёрдамни таъминлаш учун ҳам талаб этилган. Хусусан, ҳомиладорликнинг бешинчи ойида бўлган аёл фақат расмий сўровдан кейин гинеколог кўригидан ўтказилиб, тиббий назоратга олинган.

Шунингдек, Сирдарё вилоятидаги 40-сонли колонияда ҳам шунга ўхшаш муаммолар аниқланган. Икки нафар маҳкум оғриқлар ҳақида фақат ҳуқуқ ҳимоячилари билан сайёр қабул вақтида маълум қила олган. Натижада улардан бири зудлик билан шифохонага ётқизилган.

Ҳуқуқ ҳимоячилари жазони ижро этиш муассасаларида тиббий ёрдам тизимини тубдан яхшилаш зарурлигини таъкидламоқда.