10-синф ўқувчиси BMWда уриб кетган ЙПХ инспектори вафот этди

Маълум қилинишича,  жорий йилнинг 25 февраль куни соат 21:48 атрофида хизмат вазифасини бажараётган ЙПХ инспектори кичик сержант Хосилбек Эшназаровни 10-синф ўқувчиси бошқарувидаги «BMW» русумли автомашина уриб юборган. Ҳодиса натижасида у ҳаёти учун хавфли бўлган оғир тан жароҳатларини олган.

Ички ишлар органлари ходими шифокорлар назорати остида уч кун давомида даволанган. Бироқ кўрсатилган тиббий муолажаларга қарамасдан, у вафот этган.

Ички ишлар вазирлиги раҳбарияти ва кўп сонли шахсий таркиби Тошкент шаҳри ИИББ ЖХХ ЙҲХБ Йўл-патруль хизмати бригадаси 2-батальони 4-сафарбар гуруҳи йўл-патруль хизмати инспектори кичик сержант Эшназаров Хосилбек Бекназар ўғлининг вафоти муносабати билан марҳумнинг оила аъзолари ва яқинларига чуқур таъзия изҳор этди.

Маълумотга кўра, кичик сержант Хосилбек Эшназаров 2022 йилдан буён ички ишлар органларида фидокорона хизмат қилиб келган.

Марҳумдан қария ота-онаси, турмуш ўртоғи, икки нафар ўғли ва бир нафар қиз фарзанди қолгани айтилмоқда.