30 йиллик эски автомобиллар учун экологик тўлов бекор қилинмоқда

Энг муҳим ўзгаришлардан бири — 30 йил ва ундан эски автомобиллар эгалари учун экологик компенсация тўловини жорий этиш ҳақидаги норма бекор қилинишидир.

Аввалги лойиҳада 30 йилдан ошган автомобиллар эгалари ҳар йили базавий ҳисоблаш миқдорининг 30 баравари миқдорида экологик компенсация тўлаши назарда тутилган эди. Бироқ жамоатчилик фикри инобатга олиниб, ушбу талаб лойиҳадан чиқарилмоқда.

Чиқиндиларни бошқариш ва циркуляр иқтисодиётни ривожлантириш агентлиги маълумотига кўра, мамлакатда қарийб 5 миллионта автотранспорт воситаси мавжуд. Уларнинг 100 мингга яқини техник носоз бўлиб, шаҳарлардаги зарарли чиқиндиларнинг 63 фоизи айнан шу транспорт воситалари ҳиссасига тўғри келади.

Шу боис автомобиль паркини янгилаш мақсадида янги механизм таклиф этилмоқда. Бироқ бу жараён мажбурий тўловлар эмас, балки фуқароларни рағбатлантириш асосида амалга оширилиши режалаштирилган.

Таклифга кўра, эски автомобиллар мустақил баҳоловчи ташкилотлар томонидан бозор қиймати асосида баҳоланади. Ҳаракатлана олмайдиган транспорт воситалари эса мутахассислар томонидан жойига чиқиб кўрикдан ўтказилади.

Шундан сўнг автомобиль эгаси баҳоланган қийматни нақд пул ёки ваучер шаклида олиши мумкин. Ваучер янги автомобиль сотиб олишда бошланғич тўлов сифатида қабул қилинади, қолган маблағни эса 2 йилдан 7 йилгача фоизсиз бўлиб-бўлиб тўлаш имконияти яратилиши режалаштирилган.

Масалан, қиймати 165 миллион сўм бўлган Cobalt автомобили харид қилинганда, эски автомобиль 5 миллион сўмга баҳоланса, қолган 160 миллион сўмни 7 йил давомида ойига тахминан 1 миллион 900 минг сўмдан фоизсиз тўлаш мумкин бўлади.

Агентлик таъкидлашича, қонун лойиҳаси ҳали якуний қабул қилинмаган. Ҳужжат жамоатчилик ва мутахассисларнинг таклифлари асосида янада такомиллаштирилади.