Isroil Livanga yana zarbalar berdi

Ammo Livan armiyasi bugun, 17-aprel tongida Isroil otashkesim kuchga kirganidan so‘ng uni buzganini, jumladan, mamlakat janubidagi bir qancha qishloqlarni o‘qqa tutganini aytdi. Isroil hozircha bu da’volarga izoh bermadi.

“Hizbulloh” payshanba kuni bayonot berib, guruh so‘nggi hujumini mahalliy vaqt bilan soat 23:50 da – o‘t ochishni to‘xtatish kuchga kirishidan atigi 10 daqiqa oldin amalga oshirganini ma’lum qilgan.

Keyinroq ijtimoiy tarmoqlarda Trampning “Hizbulloh”ga qaratilgan o‘t ochishni to‘xtatishga amal qilish haqidagi chaqirig‘i paydo bo‘ldi.

Isroil bosh vaziri Binyamin Netanyaxu Livan bilan tinchlik o‘rnatish uchun o‘t ochishni to‘xtatishga rozi bo‘lganini, biroq Isroil qo‘shinlari Livan hududidagi "xavfsizlik zonasi"dan chiqib ketmasligini aytdi.

Livan Bosh vaziri Navof Salom sulhni olqishlab, uni “urushning birinchi kunidan beri ilgari surib kelayotgan Livanning asosiy talabi” hamda seshanba kuni AQShda Livan va Isroil rasmiylari o‘rtasida bo‘lib o‘tgan uchrashuvning bosh maqsadi deb atadi.

Shuningdek, Tramp Isroil va Livan yetakchilarini 1983-yildan buyon ilk marta ikki mamlakat o‘rtasida mazmunli muzokaralar o‘tkazish uchun Oq uyga taklif qildi.

Eron Tashqi ishlar vazirligi o‘t ochishni to‘xtatish haqidagi xabarni olqishlab, sulhni AQSH bilan mintaqaviy urushni to‘xtatib turish bo‘yicha kengroq kelishuvning bir qismi sifatida ta’rifladi.

Qatar, Iordaniya va Bahrayn ham Isroil va Livan o‘rtasidagi harbiy harakatlar to‘xtatilganini ma’qullab bayonot berishdi.

Isroil va “Hizbulloh” o‘rtasidagi jangovar harakatlar 2-martda boshlangan edi.