30 yillik eski avtomobillar uchun ekologik to‘lov bekor qilinmoqda

Eng muhim o‘zgarishlardan biri — 30 yil va undan eski avtomobillar egalari uchun ekologik kompensatsiya to‘lovini joriy etish haqidagi norma bekor qilinishidir.

Avvalgi loyihada 30 yildan oshgan avtomobillar egalari har yili bazaviy hisoblash miqdorining 30 baravari miqdorida ekologik kompensatsiya to‘lashi nazarda tutilgan edi. Biroq jamoatchilik fikri inobatga olinib, ushbu talab loyihadan chiqarilmoqda.

Chiqindilarni boshqarish va sirkulyar iqtisodiyotni rivojlantirish agentligi ma’lumotiga ko‘ra, mamlakatda qariyb 5 millionta avtotransport vositasi mavjud. Ularning 100 mingga yaqini texnik nosoz bo‘lib, shaharlardagi zararli chiqindilarning 63 foizi aynan shu transport vositalari hissasiga to‘g‘ri keladi.

Shu bois avtomobil parkini yangilash maqsadida yangi mexanizm taklif etilmoqda. Biroq bu jarayon majburiy to‘lovlar emas, balki fuqarolarni rag‘batlantirish asosida amalga oshirilishi rejalashtirilgan.

Taklifga ko‘ra, eski avtomobillar mustaqil baholovchi tashkilotlar tomonidan bozor qiymati asosida baholanadi. Harakatlana olmaydigan transport vositalari esa mutaxassislar tomonidan joyiga chiqib ko‘rikdan o‘tkaziladi.

Shundan so‘ng avtomobil egasi baholangan qiymatni naqd pul yoki vaucher shaklida olishi mumkin. Vaucher yangi avtomobil sotib olishda boshlang‘ich to‘lov sifatida qabul qilinadi, qolgan mablag‘ni esa 2 yildan 7 yilgacha foizsiz bo‘lib-bo‘lib to‘lash imkoniyati yaratilishi rejalashtirilgan.

Masalan, qiymati 165 million so‘m bo‘lgan Cobalt avtomobili xarid qilinganda, eski avtomobil 5 million so‘mga baholansa, qolgan 160 million so‘mni 7 yil davomida oyiga taxminan 1 million 900 ming so‘mdan foizsiz to‘lash mumkin bo‘ladi.

Agentlik ta’kidlashicha, qonun loyihasi hali yakuniy qabul qilinmagan. Hujjat jamoatchilik va mutaxassislarning takliflari asosida yanada takomillashtiriladi.