Tramp bilan Putin nimalar haqida gaplashdi

Tramp muzokaralar “juda samarali va mahsuldor” oʻtganini taʼkidlagan. “Biz katta yutuqlarga erishdik, ammo kelishuv tuzilmaguncha yoʻl yoʻq”, degan u. Tramp NATO va Ukraina prezidenti Vladimir Zelenskiy bilan alohida gaplashishini, keyingi qadam esa Kyiv tomonida boʻlishini aytgan. Putin esa Ukraina xavfsizligi taʼminlanishi zarurligini eʼtirof etgan, biroq urushning “ildiz sabablari” bartaraf etilmas ekan, barqaror tinchlik boʻlishi qiyinligini bildirgan.

Ikki lider matbuot anjumanida baʼzi savollarga javob bermagan. Putin qisqa nutqida AQ–Rossiya aloqalari soʻnggi yillarda “Sovuq urushdan keyingi eng past nuqtaga” tushib qolganini eslatgan va uchrashuv “koʻpdan beri kutilganini” aytgan. Tramp esa Putin bilan “har doim yaxshi munosabatda boʻlganini”, lekin birinchi prezidentligi davrida “Rossiya aralashuvi” haqidagi tergovlar bunga toʻsqinlik qilganini taʼkidlagan.

Putin keyingi uchrashuvni Moskvada oʻtkazishni taklif qilganida, Tramp bu gʻoya bahsli boʻlishini tan olib, “ehtimol mumkin”, degan. Rossiya rahbari, shuningdek, Tramp 2022 yilda prezident boʻlganida urush boshlanmagan boʻlishini taʼkidlagan.

Bahsli masalalar va siyosiy izohlar

Tramp Fox Newsʼga bergan intervyusida Putin bilan “asosan yer almashinuvi va xavfsizlik kafolatlari” boʻyicha kelishilganini aytib, uchrashuvni “10 ballik” deb baholagan. Ammo yakuniy kelishuvning Zelenskiyning roziligiga bogʻliq ekanini bildirgan: “Zelenskiy bitim qilishi kerak”.

Sobiq milliy xavfsizlik maslahatchisi Jon Boltonning aytishicha, uchrashuvda “Tramp yutqazmagan boʻlsa ham, Putin aniq gʻolib chiqdi”. Chunki Rossiya rahbari sanksiyalardan qochgan, sulhga rozi boʻlmagan va keyingi bosqichlarni oʻz foydasiga yoʻnaltirish imkonini olgan. Demokrat senator Richard Blumenthal esa uchrashuvni “hech narsa bermagan sammit” deb atab, Putinni “urush jinoyatchisi” deya qattiq tanqid qilgan.

CNN sharhlovchilariga koʻra, Putin uchrashuvdan ikki katta yutuq bilan qaytdgan AQ tomonidan qizil gilam bilan kutib olinishi va vaqt yutib, frontda qoʻshinlariga imkoniyat ochib berishi. Tramp esa koʻproq Zelenskiy va NATO zimmasiga masʼuliyatni yuklagan.

Qiziqarli tafsilotlar

Uchrashuv boshlanishida Tramp odatdagidan farqli oʻlaroq sukut saqlagan. Putin esa jurnalistlar bergan “sulhga rozimisiz?” degan savollarga javob bermay, oʻzini xuddi eshitmagandek koʻrsatgan.

Matbuot anjumanida Tramp va Putin atigi 12 daqiqa soʻzlagan: Putin sakkiz daqiqa, Tramp esa toʻrt daqiqa. Keyinroq Tramp, Hillary Klinton uni Nobel tinchlik mukofotiga nomzod qilishi mumkinligi haqidagi gaplarini “juda yoqimli” deb baholagan.

Putin Rossiyaga qaytishidan oldin Fort Richardson memorial qabristonida Ikkinchi jahon urushida halok boʻlgan sovet askarlari qabrlariga gul qoʻygan. Tramp esa olti soatlik tashrifdan soʻng Vashingtonga qaytib ketgan.