Ҳормуз бўғозида янги тартиб: кемалар қандай назорат қилинади?

Bloomberg маълумотига кўра, Ислом инқилоби қўриқчилари корпуси амалда стратегик муҳим сув йўлини назоратга олган ва халқаро ташувчиларга қатор талаблар қўймоқда.

Улардан кема, экипаж, юк ва йўналиш ҳақида тўлиқ маълумот тақдим этиш талаб қилинади. Шунингдек, Исроил ёки АҚШ билан алоқалар йўқлиги текширилади.

Маълум қилинишича, Эрон томонидан махсус тариф тизими жорий қилинган. Нефть танкерлари учун ставка бир баррель учун тахминан 1 доллардан ҳисобланади. Супертанкерлар учун умумий тўлов 2 миллион долларгача етиши мумкин. Тўловлар асосан Хитой юани ёки криптовалюта орқали амалга оширилади.

Айрим ҳолларда кемалардан ўз байроғини ўзгартириш ҳам талаб қилинмоқда. Бу орқали айрим давлатлар санкцияларни айланиб ўтиш имкониятини таклиф қилаётгани айтилмоқда.

Транзакциядан сўнг кемаларга махсус радиокод берилади ва улар Ислом инқилоби қўриқчилари корпуси патруллари кузатувида бўғоздан ўтади.

Денгиз ҳуқуқи соҳасидаги мутахассислар бундай амалиёт халқаро санкцияларга зид эканини таъкидлаб, бу ҳолат глобал логистика учун жиддий хатар туғдираётганини билдирмоқда.

Ҳормуз бўғози дунёдаги энг муҳим нефть йўлакларидан бири ҳисобланади. У ердаги ҳар қандай чеклов ёки янги қоидалар жаҳон нефть бозори ва савдо тизимига катта таъсир кўрсатиши мумкин.