“Demokrat.uz” раҳбари ва блогерга нисбатан жиноят иши қўзғатилди

Тошкент шаҳар ИИББ ҳузуридаги Тергов бошқармаси томонидан “Demokrat.uz” интернет нашри раҳбари Меҳмонов Фазлидинхон Асатиллохон ўғли ҳамда блогер Ғоипназаров Азиз Абдулла ўғлига нисбатан Ўзбекистон Республикаси Жиноят кодексининг 165-моддаси 3-қисми “а” банди (товламачилик) билан жиноят иши қўзғатилди.

Тергов маълумотларига кўра, 2025 йил 15 декабрь куни Ғоипназаров Сергели туманидаги автосалонлардан бири фаолиятини обрўсизлантирувчи видеоматериал тайёрлаб, интернет тармоқларида жойлаштирган.

Шундан сўнг, Меҳмонов ва Ғоипназаров ушбу видеолавҳани ижтимоий тармоқлардан ўчириш, шунингдек, тадбиркорни обрўсизлантирувчи бошқа видеоматериални ОАВда эълон қилмаслик эвазига жабрланувчидан товламачилик йўли билан жами 50 минг АҚШ доллари талаб қилгани айтилмоқда.

Маълум қилинишича, Меҳмонов 29 январь куни жабрланувчидан 3 минг АҚШ доллари олган. 10 февраль куни эса 17 минг АҚШ долларини олаётган вақтда далилий ашёлар билан қўлга олинган.

Ҳуқуқни муҳофаза қилувчи органлар ушбу шахсларнинг ҳаракатларидан жабр кўрган фуқароларни энг яқин ички ишлар органларига ёки 102 қисқа рақамига мурожаат қилишга чақирмоқда.

Ҳозирда тергов ҳаракатлари давом этмоқда.