Ўзбекистонда қишлоқ хўжалиги 76 млрд сўмдан зиёд зарарга кирди

Қайд этилишича, жорий йилнинг август ойида жами 195 та ҳолатда қишлоқ хўжалигига мўлжалланган 274 гектар ер майдонида ерга оид қонунбузарлик ҳолатлари қайд этилган. Шундан суғориладиган 127,0 гектар ерларда, 83,0 гектар лалми ерларда, 2,4 гектар бўз ерларда, 62,0 гектар яйлов ерларда қонунбузарлик ҳолатлари аниқланган.

Бунинг оқибатида ерларнинг ўзбошимчалик билан қишлоқ хўжалиги муомаласидан чиқарилишига сабаб бўлган. Ушбу ҳолатларда қонунбузарларга нисбатан жами 76 миллиард 916 миллион сўм миқдорида қишлоқ хўжалигига етказилган зарар ҳисобланган. 

Энг кўп қонунбузарлик ҳолатлари вилоятлар кесимида олиб қаралганда Андижон вилояти (30 та ҳолатда), Қашқадарё (43 та ҳолатда), Наманган (41 та ҳолатда), Самарқанд (29 та ҳолатда), Сурхондарё вилоятларида (19 та ҳолатда) аниқланган. 

"Аниқланган ер қонунбузарлик ҳолатларидан 109 таси прокуратура органларига, 47 таси эса ИИВ ҳудудий бўлинмаларига чора кўриш учун, 42 та ҳолатда бошқа ташкилотларга, 8 та ҳолатда ердан фойдаланувчиларга огоҳлантириш хатлари юборилган", дейилади хабарда.

Эслатиб ўтамиз, жрий йилнинг 11 сентябрь куни Президент Шавкат Мирзиёев раислигида ўтган видеоселектор йиғилишида бир йил давомида яна 50 минг гектар ерни 100 мингта камбағал оилага бўлиб бериш режалаштирилганини маълум қилинган эди.