Россия генералини ўлдиришда айбланган ўзбекистонлик эркак умрбод қамалди

Бу ҳақда Интерфакс хабар берди.

Суд қарорига кўра, Аҳмаджон Қурбонов жазонинг дастлабки 10 йилини қамоқда, қолган қисмини эса қаттиқ тартибли колонияда ўтайди. Шунингдек, унга 1 миллион рубль миқдорида жарима солинди.

Тергув маълумотларига кўра, Қурбонов террористик ҳужумни амалга оширган деб топилган. Суд мазкур иш бўйича яна уч нафар айбланувчига ҳам ҳукм чиқарди. Хусусан, Батухан Точиев 22 йилга, Рамазан Падиев 18 йилга, Роберт Сафарян эса 25 йилга озодликдан маҳрум этилди.

Қурбонов суд жараёнида ўз айбини тўлиқ тан олган ва қилмишларидан пушаймон эканини билдирган. Сафарян айбини қисман тан олган, Падиев ва Точиев эса айбловларни рад этган.

Маълумот учун, Игорь Кириллов ва унинг ёрдамчиси Илья Поликарпов 2024 йил 17 декабрь куни эрталаб Москва шаҳрининг Рязан проспектида жойлашган, генерал истиқомат қилган уй яқинида тўхтаб турган электр самокатга ўрнатилган портловчи қурилма портлаши оқибатида ҳалок бўлган. Қурбонов портлашдан бир неча соат ўтиб қўлга олинган.

Унга нисбатан терроризм, ноқонуний қурол сақлаш ва тайёрлаш билан боғлиқ жиноятлар бўйича (Жиноят кодексининг 205-моддаси 3-қисми «б» банди, 222.1-моддаси 4-қисми ва 223.1-моддаси 3-қисми) айбловлар қўйилиб, судга қадар ҳибсга олинган.

Россия ҳуқуқни муҳофаза қилиш органлари маълумотларига кўра, сўроқ пайтида Қурбонов Украина разведка хизматлари томонидан ёлланганини ҳамда жиноятни содир этгани учун унга 100 минг АҚШ доллари ва Европа давлатларидан бирига саёҳат қилиш ваъда қилинганини айтган.

Тергувчиларнинг таъкидлашича, Батухан Точиев ва Рамазан Падиев Қурбонов учун Москва вилоятидаги хостелдан хона ижарага олган. Айбловга кўра, Қурбонов ҳужумдан кейин шу ерда яшириниши режалаштирилган бўлган.