Президент собиқ маслаҳатчиси, марҳум Рустам Қосимов орден билан мукофотланди

“Мамлакатимиз мустақиллигини ва унинг маънавий асосларини мустаҳкамлаш, ўзининг катта билим ва салоҳияти, ташаббускорлик ва ташкилотчилик фазилатлари билан юртимизда соғлиқни сақлаш, таълим-тарбия, илм-фан, дипломатия, маданият ва спорт соҳаларини ривожлантириш, юқори малакали кадрларни тайёрлашга қўшган улкан ҳиссаси, жамиятимизда тинчлик ва барқарорлик, миллатлар ва динлараро дўстлик ва ҳамжиҳатликни кучайтириш, миллий ва умумбашарий қадриятларни кенг тарғиб этиш, ёш авлодни Ватанга муҳаббат ва садоқат руҳида тарбиялаш йўлида кўрсатган жонбозлиги ҳамда таваллудининг 70 йиллиги муносабати билан таниқли давлат ва жамоат арбоби, олим ва педагог, марҳум Қосимов Рустам Собирович «Фидокорона хизматлари учун» ордени билан мукофотлансин”, — дейилади хабарда.

Хўш, марҳум амалдор Рустам Қосимов аслида ўзи ким ва нима учун бу орденга лойиқ кўрилди?

Рустам Қосимов 1956 йилда Тошкент шаҳрида туғилган. Фаолияти давомида олий ва ўрта махсус таълим вазирининг биринчи ўринбосари (2001—2004 йиллар) ва олий ва ўрта махсус таълим вазири (2004—2009 йиллар), Жаҳон иқтисодиёти ва дипломатия университети ректори (2009—2011 йиллар), шунингдек, 2004 йилдан 2009 йилга қадар бош вазирнинг таълим, соғлиқни сақлаш, ижтимоий соҳа ва ёшлар сиёсати бўйича ўринбосари лавозимларида ишлаган.

2011 йилдан 2016 йилга қадар нафақада бўлган. 2016 йилнинг 16 сентябридан яна бош вазир ўринбосари ҳамда олий ва ўрта махсус таълим вазири этиб тайинланганди. 2017 йилнинг июнидан 2018 йилгача Президентнинг фан, таълим, соғлиқни сақлаш, спорт бўйича давлат маслаҳатчиси, Давлат ва жамият қурилиши академияси ректори лавозимида фаолият юритган.

2018 йилнинг 31 июлидан Президентнинг жамоат ва диний ташкилотлар билан алоқалар бўйича давлат маслаҳатчиси, 2019 -2021 йилларда Ўзбекистон халқаро ислом академияси ректори сифатида ишлаган. У 2021 йил 7 май куни оламдан кўз юмган.