"Кадрдан кесилган" Ҳусанов: Англия футболида “осиёча камситиш”

Тақдирлаш маросими вақтида юз берган бир ҳолат ижтимоий тармоқларда кенг муҳокама қилинмоқда. Корея ОАВлари тарқатган лавҳаларда «Манчестер Сити» футболчилари навбат билан саҳнага чиқиб, чемпионлик медалларини қўлга киритаётган жараён тўлиқ ёритилган. 

Бироқ камера Абдуқодир Ҳусановга келганда кутилмаганда бошқа ракурсга ўтиб кетгани эътиборни тортди. Аввалги футболчилар тақдирланаётган пайтда бундай ҳолат кузатилмагани сабабли, айрим мухлислар ва шарҳловчилар буни тасодиф эмас, балки эски баҳсларни қайта жонлантирган ҳолат сифатида баҳоламоқда.

Корея матбуоти бу каби вазиятлар Англия футболида аввал ҳам кузатилганини эслатмоқда. Хусусан, жанубий кореялик футболчилар — Пак Жи Сонг, Ки Сон Ён ва Жи Со Ён иштирок этган тақдирлаш маросимларида ҳам камеранинг бошқа томонга бурилиб кетиши муҳокамаларга сабаб бўлган. Шунингдек, япониялик Оказаки Шинжи, Минамино Такуми ва Эндо Ватару билан боғлиқ шунга ўхшаш ҳолатлар ҳам тилга олинган.
 

Қайд этилишича, Ҳусанов билан боғлиқ бу биринчи ҳолат эмас. Ўзбекистонлик футболчи жорий йил март ойида Карабао кубоги финалидан кейинги тантанали маросимда ҳам яқин планда деярли кўрсатилмагани ортидан ижтимоий тармоқларда турли баҳслар келиб чиққан эди. Бу сафарги ҳолат эса мазкур муҳокамаларни янада кучайтирди.