АҚШ ва Канададаги 500 ватандош Президентга мурожаат қилди

Ватандошлар мурожаатда Янги Ўзбекистонда амалга оширилаётган ислоҳотлар, давлат очиқлиги ва мамлакатнинг халқаро майдондаги нуфузи ортиб бораётганини эътироф этган.

Улар Ўзбекистон ва АҚШ ўртасидаги муносабатлар янги босқичга кўтарилаётганини таъкидлаб, бу жараён мамлакат учун янги имкониятлар очишига ишонч билдирган.

“Ватаннинг обрўси — бизнинг обрўйимиз. Ўзбекистоннинг ютуғи — бизнинг ютуғимиз. Ўзбекистон байроғининг дунё майдонида баланд кўтарилиши — ҳар бир ватандошимиз учун фахр ва ифтихордир”.

Ватандошлар америкалик тадбиркор ва инвесторларни Ўзбекистонга жалб қилиш, янги технология, билим ва тажрибаларни Ватанга олиб келиш, шунингдек, таълимий ва маданий алоқаларни кучайтиришга ҳисса қўшишга тайёр эканини билдирган.

Мурожаатда Президент Шавкат Мирзиёевнинг АҚШ Президенти Дональд Трамп билан бўлажак мулоқоти, олий даражадаги учрашувлар, шунингдек, АҚШ ҳукумати, Конгресси ва ишбилармон доиралари билан кенгайиб бораётган ҳамкорлик Ўзбекистон учун янги имкониятлар яратишига ишонч билдирилган.

Мурожаат “Vatan Global Alliance” жамияти раиси Озод Солиев, Ўзбекистон халқ артистлари Эркин Малаков ва Муҳаббат Шамаева, Ватан Филадельфия жамияти раиси Саидулло Аҳмедов, Ватан Нью-Йорк жамияти раиси Бахтиёр Қодиров ҳамда Америкада яшаётган 500 нафар ватандош номидан йўлланган.

Мактуб якунида ватандошлар Президент Шавкат Мирзиёев ва Ўзбекистон халқини яқинлашиб келаётган Мустақиллик байрами билан табриклаб, мамлакат тинчлиги, халқ фаровонлиги ва Янги Ўзбекистон тараққиёти йўлидаги ислоҳотларга муваффақият тилаган.