Firibgarlar huquqni muhofaza qiluvchi organlar nomidan aldamoqda – Ombudsman

Fuqaro M.P. oʻz murojaatida, 2024 yil dekabr oyida oʻzini Ichki ishlar, Davlat xavfsizlik xizmati va Markaziy bank xodimi deb tanishtirgan shaxslar taʼsirida kriptovalyuta orqali 170 000 AQSh dollarini oʻtkazib yuborganini bildirgan. Shu maqsadda u avtomashinasi va uyini sotgan, jamgʻarmalarini yoʻqotgan, hatto qarzga kirgan.

Fuqaro M.P. 2024 yil dekabrida Kiberxavfsizlik markaziga rasmiy tarzda murojaat qilib, jinoiy ish qoʻzgʻatilgan va u jabrlanuvchi sifatida tan olingan.

Ombudsman shikoyatda koʻrsatilgan vajlarga aniqlik kiritish maqsadida Ichki ishlar vazirligiga murojaat qildi.

Murojaat hamkorlikda oʻrganilishi natijasida Kiberxavfsizlik boshqarmasi tomonidan Kriptodoʻkondan fuqaro M.P. foydasiga 115 ming AQSh dollari (1 mlrd 434 mln 625 ming soʻm) undirib berildi.

Ombudsmanga firibgarlik bilan bogʻliq koʻplab murojaatlar kelib tushadi, ammo ularning katta qismida mablagʻlarni qaytarish imkoni boʻlmaydi. Bu esa bunday holatlarga aldanmaslik va oldindan ogoh boʻlishni taqozo etadi.

Shu munosabat bilan, Ombudsman fuqarolarni quyidagilarga jiddiy eʼtibor qaratishga chaqirib qoladi:

• Oʻzini huquqni muhofaza qiluvchi organ yoki bank xodimi deb tanishtirgan, ammo shaxsiy raqamlar orqali qoʻngʻiroq qilayotgan, toʻlov yoki maʼlumot soʻrayotgan shaxslarga ishonmang;

• Telefon orqali pasport yoki ID-karta, plastik karta, PIN-kod, SMS-kod kabi shaxsiy maʼlumotlarni hech kimga oshkor qilmang;

• Siz tanimagan shaxslar kriptovalyuta orqali toʻlov qilishga undasa, bu holatni darhol toʻxtating va huquqni muhofaza qiluvchi organlarga murojaat qiling;

• Davlat organlari, idora va tashkilotlar oʻz faoliyatini faqat rasmiy kanallar orqali amalga oshiradi. Shubhali holatlarda tegishli idoraning ishonchli raqamlari orqali tasdiq oling.

Ombudsman fuqarolarni avvalambor huquqiy xabardor va ogoh boʻlishga chaqiradi.