“Grand Swiss-2025”: Samarqandda 855 ming dollarlik shaxmat turniri yakunlandi

Deyarli ikki hafta mobaynida dunyo shaxmat ishqibozlari, mutaxassislari eʼtiborini Oʻzbekistonga qaratgan musobaqalar har jihatdan yuqori saviyada oʻtgani, unda kutilmagan natijalar qayd etilgani bilan “Grand Swiss-2025” xalqaro shaxmat olamida yangi tarix yaratdi.

Erkaklar musobaqasida 11 imkoniyatdan 8,5 ochko jamgʻargan niderlandiyalik Anish Giri gʻoliblikni tantana qilgan boʻlsa, undan yarim ochko ortda qolgan germaniyalik Mattias Blyubaumga 2-oʻrin nasib etdi.

Oʻzbekiston shaxmatchilaridan Nodirbek Abdusattorov va Nodirbek Yoqubboyev 7 ochko bilan 116 nafar ishtirokchi orasida qoʻshimcha koʻrsatkichlarga koʻra 10 va 14-oʻrinlardan joy egalladi.

Ayollar musobaqasida 8 ochkodan jamgʻargan hindistonlik Vayshali Rameshbabu va FIDE bayrogʻi ostida turnirda qatnashgan Katerina Lagno sovrinli oʻrinlar bilan bir qatorda nomzodlar turnirida qatnashish huquqiga ega chiqdi.

Samarqandda kechgan musobaqalarda amaldagi jahon chempioni Dommaraju Gukesh, turnirning birinchi raqamli ishtirokchisi Rameshbabu Praggnanandxa, FIDE reytingida 4-oʻrin sohibi Yan Nepomnyashiy kabi bir qator kuchli shaxmatchilar 6 ochko bilan 40-50-pogʻonalardan joy olgani har bir turdagi bahslar nechogʻli murakkab oʻtgani, shaxmatchilarning bilim darajasi yildan yilga yuksalayotganini koʻrsatdi.

Taqdirlash marosimida ishtirok etgan Oʻzbekiston yoshlar ishlari agentligi bosh direktori, mamlakat shaxmat federatsiyasi raisining birinchi oʻrinbosari A.Saʼdullayev, Samarqand viloyati hokimi A.Boboyev va boshqalar “Grand Swiss-2025”ning gʻolib va sovrindorlariga tegishli darajadagi mukofotlarni topshirdi.

Shuningdek, 2026 yilgi jahon chempionati nomzodlar musobaqasida qatnashish huquqini qoʻlga kiritgan Giri, Blyubaum, Vayshali va Lagnoni qizgʻin tabriklab, tegishli sertifikatlarni taqdim etishdi.